انتخابی نتائج سے پہلے ہی گجرات میں کمل کیسے کِھل گیا؟ کانگریس نے کہا جمہوریت خطرے میں ہے - Lok Sabha Election 2024

پولنگ سے پہلے ہی بی جے پی امیدوار مکیش دلال سورت لوک سبھا سیٹ سے بلا مقابلہ منتخب ہوگئے، کیونکہ کاغذات نامزدگی واپس لینے کے آخری روز نو میں سے سات امیدواروں نے اپنا کاغذات نامزدگی واپس لے لیا اور کانگریس امیدوار کے ساتھ ساتھ پارٹی کے متبادل امیدواروں کے پرچہ نامزدگی کو منسوخ کر دیا گیا۔

سورت: لوک سبھا انتخابات 2024 کے انتخابی نتائج سے پہلے ہی گجرات میں کمل کِھل گیا ہے۔ دراصل سورت لوک سبھا سیٹ سے کانگریس امیدوار کی کاغذات نامزدگی کی منسوخی کے بعد باقی 8 امیدواروں نے بھی اپنے نام واپس لے لیے، جس کے بعد سورت سے بی جے پی امیدوار مکیش دلال نے بلامقابلہ انتخاب جیت لیا۔

ڈسٹرکٹ کلکٹر کم الیکشن آفیسر سوربھ پاردھی نے مکیش دلال کو الیکشن کا سرٹیفکیٹ سونپتے ہوئے نامہ نگاروں کو بتایا کہ "میں اعلان کرتا ہوں کہ بی جے پی کے مکیش کمار چندرکانت دلال، سورت کے پارلیمانی حلقہ سے صحیح طریقے سے منتخب ہوئے ہیں۔

گجرات کے تمام 26 حلقوں کے لیے ووٹنگ 7 مئی کو ہونے والی ہے، لیکن سورت سیٹ کا نتیجہ پہلے ہی آ چکا ہے، جس کی وجہ سے اب صرف 25 سیٹوں پر ہی پولنگ ہوگی۔

سورت کے ضلع انتخابی دفتر کے مطابق، دلال کے علاوہ، سورت سے انتخابی میدان میں موجود تمام آٹھ امیدواروں، جس میں چار آزاد، تین چھوٹی پارٹیوں سے اور بہوجن سماج پارٹی کے پیارے لال بھارتی شامل ہیں، نے آخری دن اپنے کاغذات نامزدگی واپس لے لیے۔

قابل ذکر بات یہ ہے کہ سورت سیٹ سے کانگریس کے نیلیش کمبھانی کی امیدواری اتوار کو ہی مسترد کر دی گئی تھی جب ڈسٹرکٹ ریٹرننگ آفیسر نے پہلی نظر میں تجویز کنندگان کے دستخطوں میں تضاد پایا تھا۔ لیکن اس کے بعد سورت سے کانگریس کے متبادل امیدوار سریش پڈسالہ کا نامزدگی فارم بھی اسی بنیاد پر منسوخ کر دیا گیا۔

مکیش دلال کی جیت کا سرٹیفکیٹ

کانگریس نے اتوار کو الزام لگایا کہ کمبھنی کے نامزدگی فارم کو بی جے پی کے کہنے پر مسترد کیا گیا اور وہ اس فیصلے کو ہائی کورٹ میں چیلنج کرے گی۔

سورت لوک سبھا سیٹ سے بلامقابلہ منتخب ہونے پر، بی جے پی کے مکیش دلال نے کہا، 'آج مجھے فاتح قرار دیا گیا ہے، اس لیے گجرات اور ملک میں پہلا کمل کھل گیا ہے۔ میں پی ایم مودی، وزیر داخلہ امت شاہ، پارٹی سربراہ جے پی نڈا، ریاستی وزیر اعلی، ریاستی بی جے پی کا شکریہ ادا کرتا ہوں۔

گجرات یونٹ بی جے پی کے صدر سی آر پاٹل نے ایکس پر پوسٹ کیا کہ "سورت نے وزیر اعظم نریندر مودی کو پہلا کمل پیش کیا ہے۔ میں سورت لوک سبھا سیٹ کے لئے اپنے امیدوار مکیش دلال کو بلامقابلہ منتخب ہونے پر مبارکباد دیتا ہوں،"

واضح رہے کہ 2019 کے انتخابات میں، بی جے پی نے وزیر اعظم نریندر مودی اور مرکزی وزیر داخلہ امیت شاہ کی آبائی ریاست گجرات کے تمام 26 حلقوں پر کامیابی حاصل کی تھی۔

کانگریس کے سینئر لیڈر جے رام رمیش نے بی جے پی پر تنقید کرتے ہوئے کہا کہ جمہوریت خطرے میں ہے۔ ،" رمیش نے ایکس پر ایک پوسٹ میں کہا کہ جمہوریت خطرے میں ہے، آپ کرونولوجی کو سمجھیئے۔

انھوں نے کہا کہ سورت کے ضلع الیکشن افسر نے سورت لوک سبھا سے کانگریس کے امیدوار نیلیش کمبھانی کی نامزدگی کو منسوخ کر دیا ہے اور اس کی وجہ تین تجویز کنندگان کے دستخطوں میں تضاد بتایا ہے۔

انھوں نے آگے لکھا کہ اسی طرح کی وجوہات کا حوالہ دیتے ہوئے، عہدیداروں نے سورت سے کانگریس کے متبادل امیدوار سریش پڈسالہ کی نامزدگی کو بھی مسترد کردیا، جس کی وجہ سے کانگریس پارٹی امیدوار کے بغیر رہ گئی ہے۔

جے رام نے کہا کہ اس کے بعد بی جے پی امیدوار مکیش دلال کو چھوڑ کر باقی تمام امیدواروں نے اپنے کاغذات نامزدگی واپس لے لیے ہیں۔ 7 مئی 2024 کو ووٹنگ سے تقریباً دو ہفتے پہلے،22 اپریل 2024 کو سورت لوک سبھا سیٹ سے بی جے پی کے امیدوار کو بلا مقابلہ فاتح قرار دیا گیا۔

جے رام رمیش نے یہ بھی لکھا کہ وزیر اعظم مودی کے ناانصافی کے دور میں ایم ایس ایم ای مالکان اور تاجروں کی پریشانیوں اور غصے کو دیکھ کر بی جے پی اس قدر خوفزدہ ہے کہ وہ سورت لوک سبھا سیٹ کو میچ فکس کرنے کی کوشش کر رہی ہے۔ وہ 1984 کے لوک سبھا انتخابات کے بعد سے مسلسل اس سیٹ پر جیت رہے ہیں۔

کانگریس لیڈر نے اخیر میں لکھا کہ ہمارے انتخابات، ہماری جمہوریت، بابا صاحب امبیڈکر کا آئین، سب کچھ سنگین خطرے میں ہے، اس لیے میں دہرا رہا ہوں کہ یہ ہماری زندگی کا سب سے اہم الیکشن ہے۔