لکھنؤ: سماج وادی پارٹی کے ریاستی صدر شری شیام لال پال نے میراپور اسمبلی سیٹ کے ضمنی انتخاب میں بے ضابطگیوں کا الزام لگایا ہے اور چیف الیکٹورل آفیسر سے دوبارہ پولنگ کرانے کا مطالبہ کیا ہے۔ الزام ہے کہ علاقے کے 52 بوتھس پر ووٹنگ میں بے ضابطگیاں ہوئیں، جس کی وجہ سے دوبارہ پولنگ ضروری ہے۔
پولس افسران پر ووٹروں کو دھمکانے کا سنگین الزام لگاتے ہوئے پال نے کہا کہ ککرولی پولیس اسٹیشن انچارج راجیو شرما نے ووٹروں کو ریوالور دکھا کر ووٹ ڈالنے سے روکا اور جان سے مارنے کی دھمکی دی۔ انہوں نے مطالبہ کیا کہ ایسے افسر کو فوری گرفتار کرکے جیل بھیجا جائے، ان کی خدمات ختم کی جائیں اور جمہوری عمل میں رکاوٹ ڈالنے والے پولیس افسران کو معطل کیا جائے۔
میمورنڈم میں ملزم پولیس اہلکاروں کے ناموں کا ذکر کرتے ہوئے کہا گیا کہ پولیس انسپکٹر ببلو کمار، ٹاؤن انچارج وریندر، تھانہ صدر قطب شیر ایچ این سنگھ، انسپکٹر مہاویر چوہان، خواتین پولیس اسٹیشن انچارج سنگیتا چوہان، ایس آئی انیل کمار تومر، تھانہ صدر ہیڈ سنیل کاسانہ، انسپکٹر دھرمیندر کمار اور بلند شہر پولیس انسپکٹر پریم چندر شرما کو فوری معطل کیا جائے۔
سماج وادی پارٹی نے کہا کہ اگر قصورواروں کے خلاف کارروائی نہیں کی گئی تو اس سے الیکشن کمیشن آف انڈیا کی ساکھ کو نقصان پہنچ سکتا ہے۔ یہ میمورنڈم پارٹی کے سینئر لیڈروں کے کے سریواستو، ڈاکٹر ہریش چندر اور رادھی شیام سنگھ نے چیف الیکٹورل آفیسر کو پیش کیا۔
