Woman With Son Washed Away in Stream : అదుపుతప్పి వాగులో పడిన బైక్.. కుమారుడితో సహా గల్లంతైన మహిళ మృతి

Woman With Son Washed Away in Stream : ద్విచక్ర వాహనం అదుపుతప్పి వాగులో పడడంతో.. గర్భిణీ సహా మూడేళ్ల కుమారుడు మృతి చెందిన ఘటన హనుమకొండ జిల్లాలో చోటుచేసుకుంది. నడికూడ మండలం నర్సక్కపల్లి గ్రామానికి చెందిన తూర్పాటి రమేశ్.. తన మూడేళ్ల కుమారుడిని వెంట తీసుకుని గర్భిణిగా ఉన్న తన భార్య రాజేశ్వరితో ఆస్పత్రికి వెళ్లారు. తిరిగి ఇంటికి వస్తున్న క్రమంలో చీకటి పడింది.  కొద్ది దూరమైతే ఇంటికి చేరేతారనుకుంటుండగా.. ద్విచక్ర వాహనం అదుపుతప్పి రోడ్డు పక్కనే ఉన్న వాగులోకి పడింది.

Woman With Son Washed Away in Stream Hanamakonda :ఈ ఘటనలో బైక్​పై ఉన్న ముగ్గురు వాగులో పడిపోయారు. రమేశ్​కు ఈత రావడంతో అతను ఈదుకుంటూ ఒడ్డుకు చేరుకున్నాడు. తన భార్య, కుమారుడు వాగులో గల్లంతయ్యారని.. వారిని కాపాడే ప్రయత్నం చేసినా ఫలితం లేకపోయిందని రమేశ్‌ కన్నీటిపర్యంతమయ్యాడు. ఘటనా స్థలానికి చేరుకున్న పోలీసులు చర్యలు చేపట్టారు. గల్లంతైన వారి కోసం  ఈతగాళ్లను తెప్పించి వాగులో గాలించారు. రాత్రిపూట కావడంతో గల్లంతైన వారి ఆచూకీ తెలియలేదు. ఉదయం గాలింపు చర్యల్లో మృత దేహాలు లభ్యమయ్యాయి. బంధువులు, గ్రామస్థులు ఘటనా స్థలానికి చేరుకొని కన్నీరు మున్నీరుగా విలపిస్తున్నారు. పోలీసులు కేసు నమోదు చేసుకొని దర్యాప్తు కొనసాగిస్తున్నారు.