Woman Gave Birth On Road : గర్భిణిని భుజాలపై మోస్తూ 4కి.మీ నడక.. మార్గమధ్యలోనే ప్రసవం.. సీఎం దత్తత గ్రామంలో..

Woman Gave Birth On Road : గిరిజన గర్భిణిని భుజాలపై మోస్తూ నాలుగు కిలోమీటర్లు నడిచారు గ్రామస్థులు. సరైన రోడ్డు సౌకర్యం లేకపోవడం వల్ల భుజాలపై ఎత్తుకెళ్లారు గ్రామస్థులు. అయితే, ఆస్పత్రికి తరలిస్తుండగా మార్గమధ్యలోనే పండంటి బిడ్డకు జన్మనిచ్చింది ఆ మహిళ. ఈ ఘటన మహారాష్ట్రలోని ఠాణె జిల్లాలో జరిగింది.

ఇదీ జరిగింది
శహర్​పుర్ తాలుకాలోని పటికచపడ గ్రామానికి చెందిన గర్భిణికి ఆదివారం పురిటినొప్పులు మొదలయ్యాయి. సరైన రోడ్డు సౌకర్యం లేకపోవడం వల్ల అంబులెన్స్​ సహా ఎలాంటి వాహనం వచ్చేందుకు వీలు లేదు. దీంతో గ్రామానికి నాలుగు కిలోమీటర్ల దూరంలో ఉన్న ఆస్పత్రికి వెళ్లేందుకు.. భుజాలపై ఆమెను ఎత్తుకెళ్లారు గ్రామస్థులు. అయితే, ఆస్పత్రికి వెళ్తుండగా మార్గమధ్యలోనే పండంటి బిడ్డకు జన్మనిచ్చింది. స్థానిక ఆశా కార్యకర్త.. గ్రామస్థుల సాయంతో ఆ మహిళకు ప్రసవం చేసింది. అనంతరం ఓ ప్రైవేట్​ వాహనంలో తల్లీబిడ్డలను కాసర ప్రాథమిక ఆస్పత్రికి తరలించారు. ప్రస్తుతం తల్లీబిడ్డలు ఆరోగ్యంగానే ఉన్నారని వైద్యులు చెప్పారు.

తమ గ్రామానికి సరైన రోడ్డు సౌకర్యం లేకపోవడం అనేక ఇబ్బందులు పడుతున్నామని గ్రామస్థులు ఆవేదన వ్యక్తం చేశారు. ప్రస్తుత ముఖ్యమంత్రి ఏక్​నాథ్ శిందే.. ఠాణె ఇంచార్జీ మంత్రిగా ఉన్న సమయంలో తమ గ్రామాన్ని దత్తత తీసుకున్నారని గ్రామస్థులు చెబుతున్నారు. అయినా తమ గ్రామానికి సరైన రోడ్డు సౌకర్యం లేదని వాపోయారు. అనేక మంది అధికారులకు విన్నవించినా ప్రయోజనం లేదని ఆవేదన వ్యకం చేశారు.