శవపేటికలో మద్యం బాటిళ్లు.. అంబులెన్స్​​లో అక్రమ రవాణా

స్మగ్లర్ల ఆగడాలకు హద్దు లేకుండా పోయింది. రోజుకో కొత్త మార్గాల్లో మద్యాన్ని అక్రమంగా రవాణా చేస్తున్నారు స్మగ్లర్లు. ఇప్పుడు ఏకంగా అక్రమ రవాణా కోసం శవపేటికను వాడుకున్నారు. దాన్ని తరలిచేందుకు ఆపదలో ఆదుకునే అంబులెన్స్​ను ఉపయోగించారు. ఇలా అంబులెన్స్​లో మద్యాన్ని తరలిస్తున్న వ్యక్తులను బిహార్​ ఎక్సైజ్ పోలీసులు పట్టుకున్నారు. శవపేటికలో మద్యం బాటిళ్లను ఉంచి అక్రమంగా రవాణా చేస్తున్న గ్యాంగ్​ను.. పక్కా సమాచారంతో అదుపులోకి తీసుకున్నారు. చాకచక్యంగా వ్యవహరించి నిందితులను పట్టుకున్నారు. శవపేటికలో  ఉన్న 212 విదేశీ మద్యం బాటిళ్లను వారి నుంచి స్వాధీనం చేసుకున్నారు. గయాలోని దోభి పోలీస్ స్టేషన్ పరిధిలో ఈ ఘటన జరిగింది. ఈ మద్యం బాటిళ్లు చాలా ఖరీదైనవని పోలీసులు తెలిపారు. నిందితులు ఝార్ఖండ్​ రాజధాని రాంచీ నుంచి ముజఫర్‌పుర్​కు మద్యాన్ని తరలిస్తున్నారని పోలీసులు తెలిపారు. నిందితులను పంకజ్​ కుమార్​ యాదవ్​, లలిత్​ కుమార్​గా పోలీసులు గుర్తించారు. ఇద్దరు ఝార్ఖండ్​ చెందినవారని వారు వెల్లడించారు. నిందితులపై కేసు నమోదు చేసుకున్నామని తెలిపిన పోలీసులు.. దీనిపై పూర్తి స్థాయిలో విచారణ జరుపుతామని తెలిపారు. నిందితులు తెలివిగా శవపేటికలో మద్యాన్ని తరలించడంపై స్థానికులు ఆశ్చర్యం వ్యక్తం చేస్తున్నారు. దానికి అంబులెన్స్​ను వాడుకోవడంపై ఆగ్రహాం వ్యక్తం చేశారు.