నెలసరికి.. హార్మోన్లకు ఏంటి సంబంధం?

హార్మోన్ల అసమతుల్యత సంతానలేమి, దాంపత్య జీవితం ఇలా అనేక సమస్యలకు దారితీస్తుంది. అసలు హార్మనోల అసమతుల్యతకు కారణం ఏంటో.. అందుకు పరిష్కారం ఏంటో తెలుసుకుందాం.

నెలసరి సరిగా రాకపోవడం, సంతానలేమి, జుట్టు రాలడం, దాంపత్య జీవితం పట్ల విముఖత.. ఇలా అనేక సమస్యలకు హార్మోన్ల అసమతుల్యతే ప్రధాన కారణం. అందుకే హార్మోన్ల గురించి అవగాహన పెంచుకుందాం..

ఇవీ లక్షణాలు

పెరుగుతున్న ఒత్తిడి, మారుతున్న జీవనశైలి.. ఈ రెండూ హార్మోన్ల అసమతుల్యతకు ముఖ్య కారణాలు. అయితే హార్మోన్లు ఎక్కువగా విడుదల కావడం.. లేకపోతే మందగించడం జరిగినప్పుడు సంతానలేమి, పీసీఓడీ, ఆందోళన, జననేంద్రియాల దగ్గర పొడిబారడం, దాంపత్య జీవితం పట్ల విముఖత, మూడ్‌స్వింగ్స్‌, జుట్టు విపరీతంగా రాలిపోవడం, అలసట, మొటిమలు, యాక్నె లాంటివి తలెత్తుతాయి.

ఎందుకిలా?

విటమిన్‌ డి3 తగ్గితే శరీరం హార్మోన్లని చురుగ్గా తయారుచేసుకోలేదు. సూక్ష్మపోషకాలైన జింక్‌, మెగ్నీషియమ్‌, సెలీనియమ్‌, బీ6 వంటివి తగ్గినా, ఒత్తిడి వల్ల కూడా ఈ సమస్య వస్తుంది. దీర్ఘంగా శ్వాస తీసుకుని వదలడం వల్ల కూడా కార్టిసాల్‌ హార్మోన్‌ విడుదల తగ్గి జీవక్రియలని చురుగ్గా ఉంచే హార్మోన్లు పుష్కలంగా విడుదలవుతాయి.

ఇవి తినాలి

సల్ఫర్‌ ఉండే క్యాబేజీ, క్యాలిఫ్లవర్‌లను తీసుకుంటే కాలేయంలోని మలినాలు బయటకుపోతాయి, ఈస్ట్రోజెన్‌ పని తీరు బాగుంటుంది.

వీటికి దూరంగా..

కాస్మెటిక్స్‌, డిటర్జెంట్లు, ఫ్లోర్‌ క్లీనర్లు, పెర్‌ఫ్యూమ్‌లు, నాన్‌స్టిక్‌లు వంటివి ఈస్ట్రోజెన్‌ హార్మోను ఎక్కువగా విడుదలవడానికి కారణమవుతాయి. ప్రత్యామ్నాయంగా స్టీలు, గ్లాసు, మట్టిపాత్రలు, సేంద్రియంగా పండించిన పండ్లు, కాయగూరలను ఎంచుకుంటే మంచిది.

ఆ పాలు మంచివేనా..

గేదెలు, ఆవులకు హార్మోన్‌ ఇంజెక్షన్లను ఇవ్వడం తెలిసిందే. వాటి నుంచి తీసిన పాలు కూడా మనలో హార్మోన్ల అసమతుల్యతకు కారణమవ్వొచ్చు. వీలైనంత వరకు హార్మోన్‌ రహిత పాలకు ప్రాధాన్యం ఇవ్వాలి.

ప్రకృతి వరం

హార్మోన్ల అసమతుల్యతను సహజ పద్ధతుల్లో సరైన మార్గంలో పెట్టే ఆహారం ఉంది. అశ్వగంధ, తులసి వంటివి హార్మోన్ల సమస్యలు రాకుండా చూస్తాయి. లావెండర్‌, చందనం, థైమ్‌ నూనెలు హార్మోన్లు సరిగా విడుదలయ్యేలా చేస్తాయి. మెనోపాజ్‌ సమయంలో చికాకుల నుంచి ఉపశమనం లభించడానికి ఈ నూనెలు దోహదం చేస్తాయి.

ఇదీ చదవండి :ఇవి తినండి.. ఏకాగ్రతను పెంచుకోండి!