Yadadri Brahmotsavalu 2022: యాదాద్రీశుని వార్షిక బ్రహ్మోత్సవాలు ఆరోరోజు అట్టహాసంగా కొనసాగాయి. బుధవారం ఉదయం గోవర్దనగిరిధారి అవతారంలో భక్తులకు అభయమిచ్చిన స్వామి వారు.. సాయంత్రం యోగానంద నరసింహస్వామి అలంకారంలో సింహ వాహన సేవపై కొలువుదీరారు. విద్యుద్దీపాలంకరణతో ముస్తాబైన బాలాలయం.. ఆధ్యాత్మిక శోభతో విరాజిల్లుతోంది. బ్రహ్మోత్సవాల్లో భాగంగా ప్రతి రోజు ఉదయం, సాయంత్రం స్వామి అమ్మవార్లను వివిధ రకాల పుష్పాలతో అలంకరించి వాహన సేవలపై ఊరేగిస్తున్నారు.
నయన మనోహరం
వజ్రవైఢూర్యాలు, వివిధ రకాల పుష్పాలతో యాదాద్రీశుడిని నయనమనోహరంగా అలంకరించిన ఆలయ అర్చకులు.. సింహవాహన సేవపై ఊరేగించారు. వేదమంత్రాలు, పారాయణాలు, మంగళవాయిద్యాల నడుమ బాలాలయంలో సేవపై ఊరేగించి ప్రత్యేక పూజలు చేశారు. అనంతరం అర్చకులు సింహ వాహనసేవ విశిష్టత తెలియజేశారు.