yadadri temple news: దాదాపు ఆరేళ్లుగా బాలాలయానికే పరిమితమైన యాదాద్రి పంచనారసింహుల దర్శనాలు, ఆర్జిత పూజలు ఇక పునర్నిర్మితమైన ప్రధానాలయంలో కొనసాగనున్నాయి. ఈ నెల 28న సీఎం కేసీఆర్ సమక్షంలో జరగనున్న మహాకుంభ సంప్రోక్షణ పర్వానికి అధికారులు ఏర్పాట్లు ముమ్మరం చేశారు. స్వామి దర్శనానికి వచ్చే భక్తుల కోసం ప్లాట్ ఫారాలను సిద్ధం చేస్తున్నారు.
yadadri temple : భక్తులు ప్రధానాలయంలోకి వెళ్లేందుకు దర్శన వరుసల సముదాయం(క్యూలైన్‌ కాంప్లెక్స్‌) నాలుగు అంతస్తులో రూపుదిద్దుకుంటోంది. కొండపై ఆలయ పరిసరాలలో రెండు కనుమదారులను కలుపుతూ నిర్మితమవుతోన్న భారీ స్వాగత తోరణం పనులను అధికారులు వేగవంతం చేశారు. యాదాద్రిని మహాపుణ్యక్షేత్రంగా రూపొందించినవారి కృషికి దర్పణంగా భారీ శిలాఫలకం ఏర్పాటును చేయనున్నారు. ఆలయానికి ఉత్తర దిశలో శిలాఫలకం ఏర్పాటు చేయాలని యాడా అధికారులు నిర్ణయించారు. అందుకనుగుణంగా పనులు వేగవంతం చేశారు.