రాజులేలిన రాచకొండలో దాగున్న జలపాతాలు

ఒకప్పుడు రాజులేలిన రాచకొండ... నేడు పచ్చదనంతో, జలపాతాలతో పర్యటకులను ఆకట్టుకుంటోంది. ఇటీవల కురిసిన వర్షాలకు ఈ ప్రాంతమంతా పచ్చగా మారి సెలయేళ్ల నీటి సవ్వడితో ప్రకృతి ప్రేమికులను మైమరిపిస్తోంది. 50 అడుగుల ఎత్తు నుంచి జాలువారుతున్న రాచకొండ జలపాతం అందాలు చూసేందుకు పర్యటకులు భారీగా తరలివస్తున్నారు.

యాదాద్రి భువనగిరి జిల్లా సంస్థాన్ నారాయణపూర్ మండలంలోని రాచకొండ అటవీ ప్రాంతంలో 10 గుట్టలున్నాయి. ఇటీవల కురిసిన వర్షాలకు రాచకొండ ప్రాంతంలోని గుట్టల్లో జాలువారుతున్న నీటి ప్రవాహం ప్రకృతి ప్రేమికులను ఆకట్టుకుంటున్నాయి. పల్లగట్టు తండా, కొండమూల తండాల్లో కొండలపై నుంచి 50 అడుగుల ఎత్తులో నుంచి కిందకు జారుతున్న గంగమ్మ గలగలలు బోగత, కుంటాల జలపాతాలను తలపిస్తున్నాయి. నీటి సవ్వడులు వీణులవిందు చేస్తున్నాయి.

ఈ జలపాతాల అందాలను తిలకించేందుకు ప్రజలు భారీగా తరలివస్తున్నారు. తెల్లని పాలలాంటి నీటిలో కేరింతలు కొడుతూ ఆనందంగా గడుపుతున్నారు. సెల్ఫీలు దిగుతూ... ఆ ప్రకృతి అందాలను బంధిస్తున్నారు. కొందరు అక్కడే వంటలు చేసుకొని ప్రకృతి తల్లి ఒడిలో సేద తీరుతున్నారు. జలపాతం అందాలను చూస్తుంటే... సమయమే తెలియట్లేదని చెబుతున్నారు పర్యటకులు.

ఈ రాచకొండ ప్రాంతం రాష్ట్ర రాజధాని హైదరాబాద్​కు 40 కిలోమీటర్ల దూరంలో, నారాయణపురం మండల కేంద్రానికి 10 కిలోమీటర్ల దూరంలో ఉంది. రాచకొండ ప్రాంతంలో రెండు జలపాతాలున్నప్పటికీ... ప్రభుత్వం పట్టించుకోవట్లేదని స్థానికులు అంటున్నారు. ఈ ప్రాంతాన్ని పర్యటకంగా అభివృద్ధి చేస్తే కుంటాల, బోగత జలపాతాల మాదిరిగా రాచకొండ నిలిచిపోతుందని అంటున్నారు. అటవీ అధికారులు, ప్రభుత్వం స్పందించి ఈ ప్రాంతాన్ని అభివృద్ధి చేస్తే గొప్ప పర్యటక కేంద్రంగా మారే అవకాశం ఉందని ప్రకృతి ప్రేమికులు చెబుతున్నారు.

ఇవీ చూడండి: 'పళ్లెత్తుగా ఉన్నాయని పెళ్లానొదిలేశాడు'