పట్టభద్రుల ఎమ్మెల్సీ ఎన్నికలకు ముహుర్తం సమీపించడంతో..... ప్రధాన పార్టీల అభ్యర్థులు తమ ప్రచారాలను మరింత ముమ్మరం చేశారు. వరంగల్, నల్గొండ, ఖమ్మం... పట్టభద్రుల ఎమ్మెల్సీ ఎన్నికల్లో ప్రధాన పార్టీలు తమ అభ్యర్థులను ఇప్పటికే ఖరారు చేశాయి. తెరాస తరఫున సిట్టింగ్ ఎమ్మెల్సీ పల్లా రాజేశ్వరరెడ్డి మరోసారి అభ్యర్థిగా బరిలో నిలుస్తున్నారు. ఆరంభం నుంచి పల్లాయే అభ్యర్థిగా పోటీలో ఉంటారన్నది తెలిసినా.... ఈ నెల 7న తెలంగాణ భవన్లో జరిగిన కార్యనిర్వాహక సభలో ముఖ్యమంత్రి అధికారికంగా ఖరారు చేశారు. అయితే ఇప్పటికే పల్లా రాజేశ్వరరెడ్డి ఉమ్మడి వరంగల్ జిల్లాలో.... విస్తృతంగా పర్యటిస్తున్నారు. మంత్రి ఎర్రబెల్లి దయాకరరావు, ఎంపీలు, ఎమ్మెల్యేలు ఎక్కడికక్కడా ఈ సమావేశాలకు హాజరవుతున్నారు.
వరంగల్ అర్బన్ జిల్లా స్టేషన్ఘన్పూర్, లింగాల ఘన్పూర్, వేలేరు మండలం షోడసపల్లిలో సన్నాహక సమావేశాల్లో అభ్యర్థి పల్లా రాజేశ్వరరెడ్డితో పాటు మంత్రి ఎర్రబెల్లి దయాకరరావు, ఎంపీ పసునూరి దయాకరరావు... ఇతర నేతలు పాల్గొన్నారు. అసలైన సంక్షేమం తెరాస హయంలోనే ప్రజలకు అందిందని నేతలు పేర్కొన్నారు. సీఎం కేసీఆర్ ప్రవేశపెట్టిన పథకాలు చేసిన అభివృద్ధి.. దేశంలో ఎక్కడా లేదని చెప్పారు. పట్టభద్రుల ఓటర్లు ఇది విశ్లేషించుకుని.... తమ పార్టీకి పట్టం కట్టాలని అన్నారు.