బాత్​రూంలో కరోనా బాధితుడు క్వారంటైన్.. ఏం జరిగిందంటే!

రోజురోజుకు విజృంభిస్తున్న కరోనా.. ప్రజలను తీవ్ర ఇబ్బందులకు గురిచేస్తోంది. ఒకే గదిలో ఉంటున్న కుటుంబంలో ఎవరికైనా కరోనా సోకితే.. ఐసోలేషన్​లో ఉండటం వీలుకావడం లేదు. అలా అని ఆస్పత్రికి పోయే పరిస్థితీ లేదు. ఇలాంటి సమస్య వచ్చిన ఓ వ్యక్తి తన ద్వారా కుటుంబానికి వైరస్ సోకకూడదని మూడ్రోజుల పాటు బాత్​రూంలో క్వారంటైన్​లో ఉన్నాడు.

వికారాబాద్ జిల్లా ధరూర్ మండలం మైలారం గ్రామానికి చెందిన అశోక్.. అదే గ్రామంలో పారిశుద్ధ్య కార్మికుడిగా విధులు నిర్వహిస్తున్నాడు. కరోనా లక్షణాలు కనిపించడం వల్ల కొవిడ్ టెస్ట్​ చేయించుకున్నాడు. పాజిటివ్​గా నిర్ధరణ అయింది. తన ద్వారా కుటుంబానికి వైరస్ సోకకూడదని భావించిన అశోక్ హోం ఐసోలేషన్​లో ఉండాలనుకున్నాడు.

కానీ.. తన కుటుంబమంతా ఒకే గదిలో నివసిస్తుండటం వల్ల హోంక్వారంటైన్ వీలుపడలేదు. అలా అని ఆస్పత్రికి పోయే స్థోమత లేదు. తన వల్ల కుటుంబానికి ఏం కాకూడదని తలచిన అశోక్ గత్యంతరం లేక మూడ్రోజులుగా బాత్​రూంలోనే క్వారంటైన్ అయ్యాడు. స్థానికుల ద్వారా విషయం తెలుసుకున్న జిల్లా కలెక్టర్​ బాధితుడిని ఐసోలేషన్​ సెంటర్​కు తరలించారు.

• ఇదీ చదవండి : దీర్ఘకాల ఇబ్బందులు.. కొవిడ్‌ తగ్గినా వెన్నాడుతున్న బాధలు