త్వరలోనే సూర్యాపేట జిల్లా ఆస్పత్రిలో ఆక్సిజన్​ ప్లాంట్​

ప్రభుత్వం ఏర్పాటు చేసిన క్వారంటైన్​ సెంటర్లను కరోనా బాధితులు వినియోగించుకోవాలని మంత్రి జగదీశ్​ రెడ్డి కోరారు. కొవిడ్​ రోగులకు ధైర్యమే అత్యంత ఔషధమని చెప్పారు. ఈ మేరకు సూర్యాపేట జిల్లా వైద్యారోగ్య శాఖ అధికారులతో ఆయన సమీక్ష నిర్వహించారు.

కుటుంబంలోని మిగతా వారికి వైరస్ సోకకుండా కరోనా బాధితులు... ప్రభుత్వం ఏర్పాటు చేసిన క్వారెంటైన్ సెంటర్ సేవలను ఉపయోగించుకోవాలని విద్యుత్​ శాఖ మంత్రి జగదీశ్​ రెడ్డి కోరారు. ప్రభుత్వ క్వారంటైన్ సెంటర్లలో ఇంటి వాతావరణానికి తగ్గట్లుగా ఏర్పాట్లు చేసినట్లు తెలిపారు.

సూర్యాపేట జిల్లాలో 100 పడకలతో క్వారంటైన్​ కేంద్రాన్ని ప్రభుత్వం ఏర్పాటు చేసిందని వెల్లడించారు. జిల్లాలో కరోనా నివారణ చర్యలపై కలెక్టర్ వినయ్ కృష్ణ రెడ్డి, జిల్లా వైద్యాధికారి కోట చలం, సంబంధిత అధికారులతో మంత్రి జగదీశ్​ రెడ్డి సమీక్ష సమావేశం నిర్వహించారు.

జిల్లా ప్రభుత్వాస్పత్రిలో ఆక్సిజన్​ కొరత లేకుండా జాగ్రత్తలు తీసుకుంటామని మంత్రి అన్నారు. ఆక్సిజన్ ప్లాంటును మరి కొద్ది రోజుల్లో నిర్మించనున్నట్లు వెల్లడించారు. తుంగతుర్తి ప్రభుత్వ ఆస్పత్రిలో ఆక్సిజన్ సౌకర్యాన్ని కల్పించి కొవిడ్ వైద్యం ప్రారంభించనున్నట్లు వివరించారు.

ఇదీ చదవండి:ఓటుకు నోటు కేసు విచారణపై హైకోర్టులో రేవంత్​ పిటిషన్​