అలుగు దూకిన కొత్తచెరువు.. నీట మునిగిన రోడ్లు!

గత రెండు రోజులుగా కురుస్తున్న భారీ వర్షాలకు రాజన్న సిరిసిల్ల జిల్లాలోని చెరువులు, కుంటలు నిండిపోయాయి. వాగులు పొంగి రోడ్లపైకి ప్రవహిస్తున్నాయి. సోమవారం రాత్రి కురిసిన వర్షానికి సిరిసిల్ల పట్టణ శివారులోని కొత్త చెరువు అలుగు దూకి.. రోడ్డు మీదకు భారీగా వరద నీరు వచ్చి చేరింది. దిగువ ప్రాంతానికి వరద నీరు ప్రవహించడం వల్ల పలు నివాసప్రాంతాలు జలమయమయ్యాయి.

రాజన్న సిరిసిల్ల జిల్లాలో గత రెండు రోజులుగా కురుస్తున్న వర్షాలకు చెరువులు, కుంటలు నిండి అలుగు దూకి రోడ్లపైకి ప్రవహిస్తున్నాయి. సిరిసిల్ల పట్టణ శివారులోని కొత్త చెరువుకు భారీగా వరద నీరు చేరడం వల్ల పూర్తిగా నిండి రోడ్లపైకి ప్రవహిస్తున్నది.

వేములవాడ, సిరిసిల్ల ప్రధాన రహదారి మీదకు కొత్తచెరువు అలుగు దూకడం వల్ల వాహన రాకపోకలకు ఇబ్బందిగా మారింది. భారీస్థాయిలో వరద నీరు రోడ్డు పైకి రావడం వల్ల శాంతినగర్​లోని పలు ఇండ్లు జలమయమయ్యాయి. చాలా ఏళ్ల తర్వాత కొత్త చెరువు పూర్తిగా నిండి అలుగు దూకుతుండటం వల్ల ప్రజలు ఓ వైపు భయపడుతూనే.. చెరువు అందాలను తిలకిస్తున్నారు.

రహదారిపైకి చేరిన వరద నీరు.. రోడ్డుకు ఆనుకొని ఉన్న పలు దుకాణాల్లో చేరగా.. వ్యాపారులు ఇబ్బంది పడ్డారు. చెరువు, నాలాలు ఆక్రమించడం వల్లే.. వరద నీరు నివాస, వ్యాపారప్రాంతాల వైపు ప్రవహించిందని.. అధికారులు ఇప్పటికైనా స్పందించి.. నాలాలు మరమ్మత్తు చేయాలని స్థానికులు కోరుతున్నారు.

ఇదీ చదవండిఃతాను వాడే మాస్కులపై కేటీఆర్ ట్వీట్