ప్రేమ వేధింపులు తాళలేక బాలిక ఆత్మహత్య

తనను ప్రేమించాలంటూ సహ విద్యార్థి పెడుతున్న వేధింపులను భరించలేక ఓ ఇంటర్​ విద్యార్థిని ఆత్మహత్య చేసుకుంది. ఈ విషాద ఘటన పెద్దపల్లి జిల్లా అడవి శ్రీరాంపూర్​లో చోటుచేసుకుంది.

పెద్దపెల్లి జిల్లా ముత్తారం మండలం అడవి శ్రీరాంపూర్​లో విషాదం జరిగింది. గ్రామానికి చెందిన ఓ బాలిక ఆత్మహత్య చేసుకుంది. ముత్తారంలోని ఓ కాలేజీలో ఇంటర్ మొదటి సంవత్సరం చదువుతున్న అమ్మాయిని... అదే కాలేజీలో చదువుతున్న ఒక అబ్బాయి కొద్ది రోజులుగా ప్రేమ పేరుతో వేధిస్తున్నాడు. ఫోటోలు చూపించి బెదిరించటం వల్ల ఆ అమ్మాయి తనలో తానే కుమిలిపోయింది.

అమ్మాయి బాధను గ్రహించిన మేనమామ... అబ్బాయి తల్లిదండ్రులను కలిసి విషయం తెలిపాడు. అయినా మారకపోగా... మరింతగా వేధించసాగాడు. భరించలేకపోయిన బాలిక... ఇంట్లో ఎవరూ లేని సమయంలో ఫ్యాన్​కు చున్నీతో ఉరివేసుకుని ఆత్మహత్యకు పాల్పడింది. విగతజీవిగా వేలాడుతోన్న బాలికను చూసిన ఇరుగుపొరుగు వారు కుటుంబసభ్యులకు సమాచారమిచ్చారు.

విషయం తెలుసుకుని ఘటనా స్థలానికి చేరుకున్న పోలీసులు... కేసు నమోదు చేసి దర్యాప్తు చేస్తున్నారు. వేధింపులకు గురిచేసిన అబ్బాయిని కఠినంగా శిక్షించి... తమకు న్యాయం చేయాలని మృతురాలి బంధువులు వేడుకుంటున్నారు.

ఇదీ చూడండి:రాష్ట్ర వ్యాప్తంగా మున్సిపల్‌ కమిషనర్ల బదిలీ