telangana university registrar: తెలంగాణ యూనివర్సిటీలో మరో అనూహ్య పరిణామం..!

telangana university registrar: తెలంగాణ విశ్వవిద్యాలయంలో మరోసారి రిజిస్ట్రార్ మారారు. 40 రోజుల క్రితం బాధ్యతలు చేపట్టిన రిజిస్ట్రార్‌ను మార్చి... కొత్తగా మరొకరిని నియమించడం ఆశ్చర్యం కలిగిస్తోంది. దీంతో విశ్వవిద్యాలయంలో మూడున్నర నెలల్లోనే ముగ్గురు రిజిస్ట్రార్లు మారారు. నిత్యం ఏదో ఒక వివాదంతో వార్తల్లో నిలిచే వర్సిటీ... మరోసారి రిజిస్ట్రార్‌ మార్పుతో చర్చనీయంగా మారింది.

telangana university registrar: తెలంగాణ విశ్వవిద్యాలయంలో మరో అనూహ్య పరిణామం చోటుచేసుకుంది. రిజిస్ట్రార్ ఆచార్య యాదగిరి స్థానంలో ఆచార్య శివశంకర్ తాత్కాలిక రిజిస్ట్రార్‌గా నియమితులయ్యారు. ఈ మేరకు ఉపకులపతి రవీందర్‌గుప్తా ఆదేశాలు జారీ చేశారు. అకస్మాత్తుగా జరిగిన ఈ పరిణామం అందరినీ విస్మయానికి గురి చేసింది. గతంలో రిజిస్ట్రార్‌గా నసీం కొనసాగగా.... ఆమె స్థానంలో ఆచార్య కనకయ్యను సెప్టెంబర్ 1న నియమించారు. మరోసారి అక్టోబర్ 30న జరిగిన పాలకమండలి సమావేశంలో కనకయ్య నియామక ఉత్తర్వులను రద్దు చేసి... కొత్త ఇంఛార్జ్‌ రిజిస్ట్రార్‌గా ఆచార్య యాదగరిని తీసుకొచ్చారు. కానీ సరిగ్గా 40 రోజులకే ఇప్పుడు శివశంకర్‌కు ఇంఛార్జ్‌ రిజిస్ట్రార్‌గా బాధ్యతలు అప్పగించడం ఆశ్చర్యం కలిగిస్తోంది. కేవలం మూడున్నర నెలల్లోనే ముగ్గురు రిజిస్ట్రార్‌లు మారి... నాలుగో వ్యక్తి బాధ్యతలు తీసుకోవడం చర్చనీయాంశంగా మారింది.

ఏం జరిగింది?

telangana university Nizamabad : 2014లో నియామకమైన ఉద్యోగులు తమ సమస్యను చెప్పుకునేందుకు గురువారం వీసీ వద్దకు వెళ్లారు. వీరి సమస్య పరిష్కరించే విషయంలో రిజిస్ట్రార్ యాదగిరి, వీసీ రవీందర్‌గుప్తా మధ్య సమన్వయం కుదరలేదు. దీంతో వెంటనే రిజిస్ట్రార్​ను వీసీ మార్చేశారు. అంతకుముందు నసీంకు సైతం ఇదే విధంగా జరిగింది. తాను చెప్పినట్లుగా సంతకాలు పెట్టడం లేదని అప్పటికప్పుడు ఆచార్య కనకయ్యకు బాధ్యతలు అప్పగించారు. ఇప్పుడు మరోసారి యాదరిగి విషయంలోనూ అలాగే జరిగింది. వీసీ రవిందర్ గుప్తా నిర్ణయాలు అందరినీ ఆశ్చర్య పరుస్తున్నాయి. ఇప్పటివరకు రిజిస్ట్రార్​గా ఉన్న యాదగిరిని నేరుగా ప్రభుత్వ పెద్దలే ప్రతిపాదించినట్లుగా ప్రచారం జరిగింది. కానీ.. ఆయన ఇమడలేకపోవడం, అంతర్గత రాజకీయాలకు తోడు సమస్యలు తెచ్చి పెట్టే పనులు చేయాల్సి వస్తుందన్న ఉద్దేశంతో ఉన్నారు. ఇదే సమయంలో వీసీ సైతం యాదగిరి మీద అసంతృప్తితో శివశంకర్​ను తీసుకొచ్చారు. గతంలోనూ శివశంకర్ రిజిస్ట్రార్​గా పనిచేశారు.

నిత్యం వార్తల్లోకి...

తెలంగాణ విశ్వవిద్యాలయం ఎప్పుడూ ఏదో ఒక సమస్యతో వార్తల్లోకి ఎక్కుతోంది. ఒకటి సద్దుమణిగేలోపు మరోటి ముందుకొస్తోంది. పరిపాలనను గాడిలో పెడతామని ప్రభుత్వ పెద్దలు చెప్పిన ప్రతిసారి కొత్త సమస్యలు తలనొప్పిగా మారి కథ మళ్లీ మొదటికి వస్తోంది. ఇటీవల బయటపడిన అక్రమ నియామకాలకు స్వస్తి పలికామని అక్టోబర్ 30న జరిగిన పాలకమండలి సమావేశంలో చెప్పారు. అందుకోసం రిజిస్ట్రార్​ను సైతం మార్చి కళాశాల విద్య కమిషనర్ నవీన్ మిట్టల్ నేరుగా నియామక పత్రం అందించి వెళ్లారు. అది జరిగిన 40 రోజుల్లోనే రిజిస్ట్రార్ మారిపోయారు.

ఎప్పుడూ వివాదాలతో సతమతమవుతున్న తెలంగాణ విశ్వవిద్యాలయంలో వర్శిటీ అభివృద్ధి ఎప్పటికి జరిగేనోనని విద్యార్థులు ఆవేదన వ్యక్తం చేస్తున్నారు.

ఇదీ చదవండి:telangana university Nizamabad: తెవివి రిజిస్ట్రార్‌ కనకయ్య తొలగింపు