Minister harish rao: 'విధి నిర్వహణలో మరణించిన వైద్య సిబ్బంది కుటుంబాలను ఆదుకుంటాం'

Minister harish rao on anm death: కొవిడ్​ కష్టకాలంలో ప్రజలకు వైద్య సిబ్బంది అందిస్తున్న సేవలు ఎనలేనివని వైద్యారోగ్య శాఖ మంత్రి హరీశ్​ రావు పేర్కొన్నారు. విధి నిర్వహణలో భాగంగా ప్రాణాలు కోల్పోయిన వైద్య సిబ్బంది కుటుంబాలకు ప్రభుత్వం అండగా ఉంటుందని హామీ ఇచ్చారు. నారాయణపేట జిల్లాలో ఇటీవల రోడ్డు ప్రమాదంలో మరణించిన ఏఎన్​ఎం కుటుంబానికి మంత్రి.. ట్విట్టర్​ ద్వారా సానుభూతి తెలియజేశారు.

Minister harish rao on anm death: విధి నిర్వహణలో భాగంగా ఓ గ్రామానికి వెళ్తున్న ఏఎన్​ఎం.. రోడ్డు ప్రమాదంలో మరణించిన ఘటనపై వైద్యారోగ్య శాఖ మంత్రి హరీశ్​ రావు విచారం వ్యక్తం చేశారు. ట్విట్టర్​ ద్వారా మృతురాలి కుటుంబ సభ్యులకు ప్రగాఢ సానుభూతి తెలియజేశారు. నారాయణ పేట జిల్లా మక్తల్ పట్టణానికి చెందిన ఏఎన్​ఎం వరలక్ష్మి.. ఇటీవల మాగనూరు మండల కేంద్రం నుంచి కొల్పూర్ గ్రామానికి.. విధి నిర్వహణలో భాగంగా స్కూటీపై వెళ్తున్నారు. ఆ సమయంలో వడ్వాట్ గేటు వద్ద లారీ ఢీకొని వరలక్ష్మీ మృతి చెందింది.

రూ. 50 లక్షల బీమా సొమ్ము

ఘటనపై విచారం వ్యక్తం చేసిన మంత్రి.. కరోనా కష్ట కాలంలో విధుల్లో ఉండి మరణించిన వారి కుటుంబానికి ప్రభుత్వం నుంచి రూ. 50 లక్షల బీమా సొమ్ము అందుతుందని పేర్కొన్నారు. వారి కుటుంబంలో ఒకరికి కాంట్రాక్టు ఉద్యోగం కల్పిస్తామని చెప్పారు. మృతులకు ప్రభుత్వ ఖర్చులతో అంత్యక్రియలు నిర్వహించాలని జిల్లా వైద్య అధికారులను ఆదేశించినట్లు చెప్పారు. వరలక్ష్మి కుటుంబానికి ప్రభుత్వం అన్ని రకాలుగా అండగా ఉంటుందని భరోసా ఇచ్చారు. కొవిడ్​ సంక్షోభంలో ప్రజలకు వైద్య సిబ్బంది అందిస్తున్న సేవలు వెలకట్టలేనివని మంత్రి హరీశ్​ రావు తెలిపారు.

ఇదీ చదవండి:Governor with farmers: 'నేను ఎవరో తెలుసా... మీకోసమే వచ్చా'