TS Teachers Transfers: తప్పుల తడకగా సీనియారిటీ జాబితా.. ఉపాధ్యాయుల అభ్యంతరాలు

TS Teachers Transfers: 317జీవో ప్రకారం ప్రభుత్వం చేపట్టిన ఉద్యోగుల స్థానిక కేడర్ కేటాయింపుల ప్రక్రియపై ఉపాధ్యాయ వర్గాల నుంచి అభ్యంతరాలు వెల్లువెత్తున్నాయి. సీనియారిటీ జాబితా తప్పులతడకగా ఉందని ఉపాధ్యాయ సంఘాలు ఆరోపిస్తున్నాయి. ఈ జాబితా రూపకల్పనలో లోపాల కారణంగా సొంత జిల్లాల్లో పనిచేసుకునే అవకాశం కోల్పోయి, స్థానికేతర జిల్లాల్లో పనిచేయాల్సి వస్తోందని వారు ఆవేదన వ్యక్తం చేస్తున్నారు. స్థానికత ఆధారంగా బదిలీలు చేపడితే బాగుండేదనే అభిప్రాయం ప్రముఖంగా వ్యక్తమవుతోంది. దీనికి తోడు ప్రభుత్వమిచ్చిన ఐచ్ఛికాల్లో భార్య, వితంతు ఉద్యోగులకు ప్రాధాన్యం ఇవ్వడం లేదని సంఘాలు ఆరోపిస్తున్నాయి. ఐచ్ఛికాల ఎంపిక, అభ్యంతరాల నమోదు కోసం ప్రభుత్వం మరింత సమయం కేటాయించాలని కోరుతున్నారు.

TS Teachers Transfers : రాష్ట్రంలో 317 జీవో ప్రకారం చేపడుతున్న స్థానిక కేడర్ కేటాయింపుల ప్రక్రియపై ఉపాధ్యాయుల నుంచి అభ్యంతరాలు వెల్లువెత్తున్నాయి. ఈ మేరకు మహబూబ్​నగర్ జిల్లా డైట్ కళాశాలలో ఉపాధ్యాయులు పెద్దఎత్తున అధికారులకు విన్నవించుకుంటున్నారు. సీనియారిటీ ఆధారంగా బదిలీలు చేపడుతున్నందున సొంత జిల్లాల్లో పనిచేసే అవకాశం కోల్పోతున్నట్లు వాపోతున్నారు. 6 నుంచి పదో తరగతి వరకు ఎక్కడ చదివితే ఆ ప్రాంతాన్నే స్థానిక జిల్లాగా కేటాయించాలని డిమాండ్ చేస్తున్నారు. ప్రస్తుత విధానంతో సీనియారిటీ ఉన్న వారు తమకు నచ్చిన జిల్లాను ఎంచుకుంటున్నారని, వెనకబడినవారు మిగిలిన జిల్లాల్లో పనిచేయాల్సిన దుస్థితి నెలకొందని వాపోతున్నారు.

ఎస్సీ, ఎస్టీ, బీసీలకు అన్యాయం..

Telangana Teachers Transfers: మరోవైపు సీనియారిటీ జాబితా రూపకల్పన తప్పుల తడకగా ఉందని ఉపాధ్యాయులు ఆరోపిస్తున్నారు. జాబితా రూపకల్పనలో డీఎస్సీ మార్కులను జత చేయకపోవడంపై పెద్దఎత్తున అభ్యంతరాలు వ్యక్తం చేస్తున్నారు. మార్కులను పరిగణలోకి తీసుకోని కారణంగా సీనియారిటీలో వెనకబడ్డామని కొందరు వాపోతున్నారు. ఎస్జీటీలుగా కొన్నేళ్లు పనిచేసి.. స్కూల్ అసిస్టెంట్‌లుగా పదోన్నతి పొందిన ఉపాధ్యాయుల సీనియారిటీని.. పదోన్నతి పొందిన కాలం నుంచి లెక్కిస్తున్నారని మరికొంతమంది అభ్యంతరం వ్యక్తం చేస్తున్నారు. ప్రెసిడెన్షియల్ ఆర్డర్ ప్రకారం ఎస్సీ, ఎస్టీ, బీసీలకు సరైన న్యాయం జరగలేదని ఆరోపిస్తున్నారు.

"ఈ జీవోతో స్థానికులు స్థానికేతరులుగా మారే పరిస్థితి ఏర్పడింది. ముఖ్యంగా జూనియర్లు వేరే ప్రాంతాలకు వెళ్లాల్సిన దుస్థితి. స్కూల్ అసిస్టెంట్​గా ప్రమోట్ అయిన వాళ్లు.. వారు ప్రమోషన్ పొందిన తేదీనే ప్రాముఖ్యంగా తీసుకోవడం వల్ల వారు అంతకు ముందు ఎన్నేళ్లు పనిచేసినా.. సీనియారిటీ జాబితాలో కింద ఉంటున్నాం. మెరిట్ ప్రకారం.. స్థానికత ఆధారంగా బదిలీ చేయాలి. ఇప్పుడున్న ఐచ్ఛికాల్లో భార్య, భర్త అనే ఆప్షన్లు లేవు. ఇలా అయితే భార్య ఒకచోట.. భర్త మరోచోట ఉద్యోగం చేయాల్సిన పరిస్థితులు ఏర్పడతాయి."

- ఉపాధ్యాయులు

వాళ్లకి నష్టం..

Teachers Transfers in Telangana: భాషా పండితుల సీనియారిటీ జాబితా రూపకల్పనలో కూడా అన్యాయం జరిగినట్లుగా హిందీ పండిట్లు ఆరోపిస్తున్నారు. 2002 డీఎస్సీలో కోర్టు ఆదేశాలతో అప్పట్లో కొందరు హిందీ పడింట్లను విధుల్లోకి తీసుకోలేదు. ఆ తర్వాత వారంతా 2006, 2008, 2009లో విడతల వారీగా ఉద్యోగాల్లో చేరారు. ఈ పరిస్థితుల్లో ఉద్యోగంలో చేరిన ఏడాదిని పరిగణలోకి తీసుకోకుండా 2002 నుంచి సీనియారిటీని లెక్కించారని.. వారికంటే ముందే ఉద్యోగాల్లో చేరిన వాళ్లు సీనియారిటీలో వెనకబడినట్లు హిందీ ఉపాధ్యాయులు ఆరోపిస్తున్నారు. ప్రభుత్వం ఇచ్చిన ఐచ్ఛికాల్లో, భార్య, వితంతు ఆప్షన్లకు ప్రాధాన్యం ఇవ్వడం లేదని.. దీంతో ఒకేచోట ఉద్యోగం చేయాలనుకునే భార్యాభర్తలు, వితంతు ఉద్యోగులు తీవ్రంగా నష్టపోతున్నట్లు అభిప్రాయపడుతున్నారు.

హడావుడిగా ఐచ్ఛికాలు, అభ్యంతరాల ప్రక్రియను చేపట్టే బదులు మరింత సమయం ఇవ్వాలనే డిమాండ్లు ప్రధానంగా వినిపిస్తున్నాయి.

• ఇదీ చదవండి :Employees Transfer: బదలాయింపు కోసం 60 వేల దరఖాస్తులు!