యాసంగిలో పండిన ధాన్యాన్ని ప్రతిగింజ కొంటామని చెప్పిన తెరాస సర్కారు... ఆ మేరకు ఉమ్మడి పాలమూరు జిల్లాల్లో కొనుగోలు కేంద్రాలను ప్రారంభించకపోవడం రైతులను ఇబ్బందులకు గురి చేస్తోంది. 5 నుంచి 7లక్షల మెట్రిక్ టన్నుల ధాన్యం కొనుగోలుకు వస్తుందన్న అంచనాతో 800 కొనుగోలు కేంద్రాలు ఏర్పాటు చేయాలని నిర్ణయించారు. ప్రస్తుతానికి మాత్రం ఉమ్మడి జిల్లా వ్యాప్తంగా 200 కేంద్రాలు కూడా ప్రారంభం కాలేదు. తేమశాతం, నాణ్యత లేవన్న కారణంతో... కొనుగోళ్లలో జాప్యం చేస్తున్నారని రైతులు ఆరోపిస్తున్నారు. వాతావరణం దృష్ట్యా ప్రభుత్వ కొనుగోలు కేంద్రాల్లో పడిగాపులు కాయలేక ప్రైవేటులో తక్కువ ధరకే ధాన్యాన్ని అమ్ముకుంటున్నామని రైతులు చెబుతున్నారు.
కొనుగోలు కేంద్రాల వద్ద తాగునీరు, షామియానాలు, టార్పాలిన్లు అందుబాటులో లేక అవస్థలు పడుతున్నారు. కొన్నిచోట్ల అన్నదాతలే తూకం యంత్రాలను అద్దెకు తీసుకువస్తున్నారు. బస్తాలు నింపి సొంత వాహనాల్లో.... కొనుగోలు కేంద్ర నిర్వాహకులు చెప్పిన మిల్లుకు తరలిస్తున్నారు. లారీలు సకాలంలో రాక, హమాలీలు అందుబాటులో లేక ఇబ్బందులు పడుతున్నామని చెబుతున్నారు.