Mahabubnagar General Hospital Parking: మహబూబ్నగర్ జిల్లా ఆస్పత్రికి నిత్యం 2వేల మంది బయటి రోగులు వచ్చి వెళ్తుంటారు. అలాగే రోగుల సహాయకులు.. వారిని పరామర్శించేందుకు వచ్చేవాళ్లు, ఇతర పనుల మీద వచ్చే వారు ఇలా.. వేలాది మంది జనరల్ ఆసుపత్రికి వస్తుంటారు. అలాంటి వాళ్లలో ద్విచక్రవాహనాలు, ఆటోలు, అద్దె వాహనాల్లో వచ్చే వాళ్లే అధికంగా ఉంటారు. వీళ్లంతా ఆసుపత్రిలో వాహనాల్ని నిలపాలంటే పార్కింగ్ రుసుం కింద ద్విచక్రవాహనాలకు 10, పెద్ద వాహనాలు 20రూపాయలు చెల్లించాలి.
ఇంతవరకూ బాగానే ఉన్నా.. పార్కింగ్ రుసుం వసూలు చేసేందుకు టెండర్ దక్కించుకున్న గుత్తేదారు గడువు ముగిసినా.. రుసుం వసూలు చేయడం, పట్టించుకోవాల్సిన అధికారులు చూసిచూడనట్లు వ్యవహరించడం జరుగుతోంది. రసీదులు బిల్లు పుస్తకం నుంచి ఇవ్వకుండా జిరాక్స్ తీయించినవి ఇస్తున్నారు. డబ్బులివ్వపోతే బలవంతంగా వసూలు చేస్తున్నారని ఆస్పత్రికి వచ్చేవారు వాపోతున్నారు.