ఉత్తర తెలంగాణలో ప్రభుత్వ పనులు, ప్రాజెక్టులు అభివృధి పథంలో దూసుకుపోతుంటే.. దక్షిణ తెలంగాణలో ఎక్కడేసిన గొంగడి అక్కడే అన్న చందంగా ఉన్నాయని ఏఐసీసీ కార్యదర్శి సంపత్ కుమార్ మండిపడ్డారు. ఆరేళ్లుగా చేపడుతున్న అభివృద్ధి పనులు నత్తనడకన సాగుతుంటే... అభివృద్ధి జరిగిందంటూ ఇప్పుడు ఏ విధంగా జిల్లా పర్యటనకు వస్తున్నారని విమర్శించారు. మహబూబ్నగర్ జిల్లా కేంద్రంలోని కాంగ్రెస్‌ పార్టీ కార్యాలయంలో ఏర్పాటు చేసిన సమావేశంలో ఆయన పాల్గొన్నారు.
ఓ వైపు కాళేశ్వరం ప్రాజెక్ట్‌ పూర్తి కావొస్తుంటే... జిల్లాలో ప్రభుత్వం శంకుస్థాపన చేసిన పాలమూరు-రంగారెడ్డి, తుమ్మిళ్ల పథకాలకు 20 శాతం నిధులు కూడా కేటాయించలేదని మండిపడ్డారు. ఉమ్మడి జిల్లాలో తలపెట్టిన 4 ప్రాజెక్టులూ పెండింగ్‌లో ఉన్నాయని ఆవేదన వ్యక్తం చేశారు. చారిత్రాత్మకమైన సరళాసాగర్ కట్ట తెగిపోతే ఇప్పటి వరకు స్పందించలేదని ఆరోపించారు.