బాలురను హింసించిన ఘటనలో ఇద్దరు నిందితులు అరెస్టు

మహబూబాబాద్ జిల్లా తొర్రూరులో మామిడికాయలు దొంగతనం చేశారన్న నెపంతో... ఇద్దరు బాలురను చెట్టుకు కట్టేసిన ఘటనలో నిందితులను తొర్రూరు పోలీసులు అరెస్ట్ చేసి మీడియా ముందు ప్రవేశపెట్టారు. వారిని కోర్టులో హాజరుపరచనున్నట్లు వెల్లడించారు.

చేతులు కట్టేశారు. పిల్లలని కూడా చూడకుండా దారుణంగా కొట్టారు. ఏడుస్తున్నా... వినలేదు సరికదా... వారి ముఖానికి పేడ రాసి బలవంతంగా తినిపించారు. ఇంతకు ఈ పిల్లలు చేసిన నేరం ఏంటంటే... మామిడి తోటలోకి వెళ్లడమే. అభం శుభం తెలియని చిన్నారులపై పైశాచికంగా ప్రవర్తించిన ఇద్దరు కాపలాదార్లను తొర్రూరు పోలీసులు అరెస్ట్ చేశారు.

వికృతానందం...

గురువారం సాయంత్రం తొర్రూరు కుంటాయపాలెం రోడ్డులో ఇద్దరు మైనర్ బాలురు... తప్పిపోయిన తమ కుక్కపిల్ల కోసం వెతుకుతూ మామిడి తోటలోకి వెళ్లారు. ఇది గమనించిన కాపలాదార్లు... బానోత్ యాకూబ్, బానోత్ రాములు.. మామిడి కాయలు దొంగతనానికి వచ్చారంటూ వారిని దుర్భాషలాడారు. చేతులు కట్టేసి కొట్టి ముఖానికి పేడ రాసి బలవంతంగా తినిపించి వికృతానందం పొందారు. అంతేకాదు తామేదో ఘనకార్యం చేశామనుకుని... వీడియో తీసి సామాజిక మాధ్యమాల్లో పెట్టారు.

ఉపేక్షించం...

వెంటనే అప్రమత్తమైన పోలీసులు... కేసు నమోదు చేసి విచారణ చేపట్టారు. హచ్చుతండాలో ఓ ఇంట్లో దాగి ఉన్న ఇద్దరు కాపాలదార్లను అరెస్ట్ చేసి మీడియా ముందు ప్రవేశపెట్టారు. ఈ తరహా అమానవీయ ఘటనలు పాల్పడేవారెవరైనా ఉపేక్షించేది లేదని వారిపై కఠిన చర్యలు తప్పవని పోలీసు అధికారులు హెచ్చరించారు.

ఇదీ చూడండి:లైవ్​ వీడియో: చిన్న పిల్లల్ని చితకబాది.. పేడ తినిపించారు