సివిల్‌ వివాదంలో పోలీసులు .. స్పందించిన హైకోర్టు

సివిల్‌ వివాదంలో పోలీసులు తలదూర్చడంపై హైకోర్టు స్పందించింది. పూర్తి వివరాలతో అఫిడవిట్‌ దాఖలు చేయాలని భద్రాద్రి కొత్తగూడెం జిల్లా ఎస్పీకి ఆదేశాలు జారీచేసింది. బాధితుని భార్య గవర్నర్​కు లేఖ రాయగా... దాన్ని తమిళిసై హైకోర్టుకు పంపారు.

భద్రాద్రి కొత్తగూడెం జిల్లా ములకలపల్లి మండలం వేముగుంటలో 6 ఎకరాల భూ వివాదానికి సంబంధించి పూర్తి వివరాలతో తాజా అఫిడవిట్‌ దాఖలు చేయాలని జిల్లా ఎస్పీకి మంగళవారం రోజున హైకోర్టు ఆదేశాలు జారీచేసింది. ఈ భూవివాదానికి సంబంధించి సివిల్‌ కోర్టులో ఉన్న కేసు వివరాలనూ సమర్పించాలని ఆదేశించింది.

తదుపరి విచారణను సెప్టెంబరు 1వ తేదీకి వాయిదా వేసింది. సివిల్‌ వివాదంలో తన భర్త, మామలను పోలీసులు పిలిపించి వేధింపులకు గురిచేశారని, తలపై తుపాకీ పెట్టి ఆ భూమిలోకి వెళ్లకూడదని బెదిరించారని కొండూరు ఈశ్వరమ్మ రాసిన లేఖను గవర్నర్‌ తమిళిసై.. హైకోర్టుకు పంపారు. ఈ లేఖను హైకోర్టు పరిగణనలోకి తీసుకుంది.

ఇదీ చదవండి:PRAGATHI: రాష్ట్రవ్యాప్తంగా పదిరోజుల పాటు పల్లె, పట్టణ ప్రగతి కార్యక్రమాలు