Skating Race: స్మార్ట్ సిటీలో స్కేటింగ్ రేస్.. చిన్నారుల ఆసక్తి

Skating Race: చిన్నారులకు ఆటలంటే మహా ఇష్టం. రెండేళ్ల నుంచి ఇళ్లకే పరిమితం కావడంతో.. శారీరకంగా ఇబ్బందులు ఎదుర్కొంటున్నారు. ఇప్పుడిప్పుడే... ఆరుబయట ఆటలాడేందుకు పార్కులు, మైదానాలకు తరలివస్తున్నారు. కరీంనగర్‌లోని చిన్నారులు స్కేటింగ్‌ పట్ల అమితాసక్తి కనబరుస్తున్నారు. అది గ్రహించిన అధికారులు స్కేటింగ్‌ రింక్‌ ఏర్పాటు చేయడంతో.. కేరింతలు కొడుతూ ఉదయం వేళ శిక్షణ పొందుతున్నారు. మానసికోల్లాసంతోపాటు పతకాలు సాధిస్తున్నారు.

Skating Race: కరీంనగర్‌లో చిన్నారులు స్కేటింగ్ పట్ల అమితాసక్తి చూపుతున్నారు. గతంలో రోలార్‌ స్కేటింగ్‌ శిక్షణకు సరైన సదుపాయాలు లేకపోవడంతో చిన్నారులు దిగువమానేరు జలాశయం వద్ద నేర్చుకునేవారు. కరీంనగర్‌ ఆకర్షణీయ నగరాల జాబితాలో చేరిన తర్వాత.. హైదరాబాద్‌ వంటి మహానగరాలకే పరిమితమైన క్రీడా సదుపాయాన్ని స్మార్ట్‌సిటీ నిధులతో ఇక్కడ ఏర్పాటు చేశారు. స్కేటింగ్‌లో ఆసక్తి కనబరుస్తున్న పిల్లలకు శిక్షణ ఇచ్చేందుకు నగరంలోనే ప్రత్యేక రింక్‌ ఏర్పాటు చేశారు.

కొత్త రింక్...

గతంలో నిర్మించిన రింక్‌ పాడవటంతో.. రూ.30లక్షలతో కొత్త రింక్‌ను అందుబాటులోకి తీసుకొచ్చారు. దీంతో నగరంలోని చిన్నారులు.. కాళ్లకు చక్రాలు కట్టుకుని రింక్‌లో సాధన చేస్తున్నారు. ఇప్పటికే శిక్షణ పొందిన చిన్నారులు అద్భుత ప్రతిభ కనబరుస్తున్నారు. రాష్ట్రస్థాయిలో బంగారు, రజత పతకాలు సాధించారు.

ఇళ్లకే పరిమితం...

కొవిడ్‌ కారణంగా పిల్లలు ఇళ్లకే పరిమితమయ్యారని... వారిలో ఒత్తిడిని అధిగమించడంతోపాటు... మానసికోల్లాసం అందించేందుకు... స్కేటింగ్‌ ఎంతో ఉపయోగపడుతోందని తల్లిదండ్రులు అంటున్నారు. ప్రస్తుత పరిస్థితుల్లో చిన్నారుల శారీరక ఎదుగుదలకు క్రీడాలు తోడ్పడుతాయని మానసిక వైద్యనిపుణులు చెబుతున్నారు. స్కేటింగ్‌ రింక్‌ ఏర్పాటు, సౌకర్యాలు కల్పించడంతో శిక్షణ మరింత సులభమైందని కోచ్‌ చెబుతున్నారు. పిల్లలు ఆటపై మరింత ఆసక్తి కనబరుస్తున్నారని... శిక్షణకు వచ్చేవారి సంఖ్య పెరిగే అవకాశముందని అభిప్రాయపడ్డారు.

సంబంధం కోసం వెతుకుతున్నారా? తెలుగు మాట్రిమోనిలో రిజిస్ట్రేషన్ ఉచితం!

ఇదీ చదవండి:Schools Reopen in Telangana : విద్యాసంస్థలు తెరిచేందుకే సర్కార్ మొగ్గు