విషజ్వరాల విజృంభణతో ఆసుపత్రులు కిటకిట

ఉమ్మడి నిజామాబాద్ జిల్లా ప్రజలను విష జ్వరాలు వణికిస్తున్నాయి. ప్రైవేటు, ప్రభుత్వ అన్న తేడా లేకుండా ఆస్పత్రులన్నీ రోగులతో కిటకిటలాడుతున్నాయి. వాతావరణ మార్పులతో గత 20 రోజులుగా విష జ్వరాలు తీవ్రం కాగా... డెంగీ, మలేరియా కేసులు అధికంగా నమోదవుతున్నాయి. జ్వరాల తీవ్రత దృష్ట్యా ఆదివారం సైతం ఓపీ సేవలు అందించాలని ఆస్పత్రులకు ప్రభుత్వం నుంచే ఆదేశాలు వచ్చాయి.

నిజామాబాద్ ప్రభుత్వ జనరల్ ఆస్పత్రిలో 550 పడకలు ఉండగా... ఒక్క పడక కూడా ఖాళీ లేదంటే జ్వరాల తీవ్రత ఎంతగా ఉందో అర్థం చేసుకోవచ్చు. ప్రతి రోజూ ఆస్పత్రికి 1100 ఓపీ ఉంటుంది. సోమ, శని వారాల్లో ఈ సంఖ్య 1300 దాటుతుంది. ఇందులో ప్రతి రోజూ జ్వరాలతో బాధపడే వారి సంఖ్య 350 నుంచి 450గా ఉంటోంది. అలాగే ఆస్పత్రిలో చేరి చికిత్స తీసుకునే జ్వర బాధితుల సంఖ్య అధికంగానే ఉంటోంది. ప్రతి రోజూ 90 నుంచి వంద మంది ఆస్పత్రిలో ఇన్ పేషెంట్లుగా చేరుతుండగా... ఇందులో సగం అంటే 50 మంది వరకు జ్వరంతో బాధపడుతున్నారు. గత 20 రోజుల్లో దాదాపు వెయ్యి మందికి పైగా ప్రజలు జ్వరంతో ఆస్పత్రిలో చేరి చికిత్స పొందారు.

చిన్నపాటి జ్వరాలకే ప్టేట్​లైట్స్ తగ్గుదల

కామారెడ్డి జిల్లాలోనూ పరిస్థితి తీవ్రంగానే ఉంది. ఎక్కడ చూసినా రోగులు జ్వరంతో ఆస్పత్రులకు పరుగులు పెడుతున్నారు. జిల్లా కేంద్ర ఆస్పత్రిలో వంద పడకలుండగా... ప్రతి రోజూ ఇన్ పేషెంట్లు 30-40 మంది ఆస్పత్రిలో చేరుతున్నారు. వీరిలో జ్వరంతో బాధపడేవారి సంఖ్య 25 వరకు ఉంటోంది. ప్రతి రోజూ అవుట్ పేషెంట్లు 850 నుంచి 920 వరకు ఉంటున్నారు. వీరిలో జ్వరంతో బాధపడేవారు దాదాపు 600 మంది వరకు ఉంటున్నారు. అయితే చిన్నపాటి జలుబు, జ్వరానికే ప్లేట్ లెట్ల సంఖ్య పడిపోతుండటం వల్ల జనం హైదరాబాద్​కు పరుగులు పెట్టాల్సి వస్తోంది.

మలేరియా, డెంగీలే ఎక్కువ

జిల్లా కేంద్రంలోని ఆస్పత్రుల్లోనే ఇంతమంది చికిత్స పొందితే... మరి మిగతా ఆస్పత్రులకు ఎంత మంది వెళ్తున్నారో. ఈ ఏడాదిలో ఇప్పటి వరకు జిల్లా వ్యాప్తంగా 47 డెంగీ కేసులు నమోదు కాగా... జులైలో 15, ఆగస్టు నెల మొదటి 13 రోజుల్లో నాలుగు కేసులు నమోదయ్యాయి. విష జ్వరాల సంఖ్య పెరగడం వల్ల ప్రతి రోజూ 250 నుంచి 300 మంది రక్త నమూనాలు జిల్లా ఆస్పత్రికి వస్తున్నాయి. అలాగే పది మంది మలేరియాతో బాధపడుతున్నారు. జిల్లాలో ఇటీవల కురిసిన వర్షాల వల్ల ఎక్కడికక్కడ నీరు నిలిచి దోమలు విపరీతంగా పెరిగిపోయాయి. వీటి నివారణకు కనీస చర్యలు లేక పరిస్థితి అధ్వాన్నంగా మారింది. నగర పాలక సంస్థ, మున్సిపాలిటీలు, గ్రామ పంచాయతీల పరిధిలో నిర్లక్ష్యం వల్లే ప్రజలు రోగాల బారిన పడుతున్నారు.

జ్వరాల తీవ్రత అధికమైనందున ప్రభుత్వ ఆస్పత్రుల్లో ఆదివారం సైతం ఓపీ కొనసాగించాలని సర్కారు ఆదేశాలిచ్చింది. వైద్యంతోపాటు గ్రామీణ, పట్టణ ప్రాంతాల్లో ప్రభుత్వం పారిశుద్ధ్యంపైనా దృష్టి సారిస్తేనే విషజ్వరాలను తగ్గించవచ్చు.

ఇవీ చూడండి: 'సింధు గెలుపు.. క్రీడారంగంలో గొప్ప మలుపు'