భూ తగాదాల్లో అన్నను నరికి చంపిన తమ్ముడు.!

భూమి విషయంలో వచ్చిన తగాదా ఒక వ్యక్తి మరణానికి కారణమైన ఘటన కామారెడ్డి జిల్లా భిక్నూర్​ మండలంలో చోటు చేసుకుంది. కోపంలో అన్న మీద తమ్ముడు కొడవలితో దాడి చేయడం వల్ల అన్న అక్కడికక్కడే ప్రాణాలు కోల్పోయాడు.

కామారెడ్డి జిల్లా భిక్నూర్​ మండలం తిప్పాపూర్​ గ్రామానికి చెందిన రాజయ్య, శంకర్​లు అన్నదమ్ములు. ఇద్దరు అన్నదమ్ముల మధ్య భూమి విషయంలో గత కొంతకాలంగా గొడవలు జరుగుతున్నాయి. తాజాగా బుధవారం రాత్రి ఇద్దరు అన్నదమ్ములు అర్ధరాత్రి వరకు మద్యం సేవిస్తూ.. భూమి గురించి చర్చించుకున్నారు. ఆ సమయంలో రాజయ్యకు కొడుకులు లేని కారణంగా రాజయ్య భూమి కూడా తనకే చెందుతుందని తమ్ముడు శంకర్​ అన్నాడు. అందుకు ఒప్పుకోని రాజయ్య శంకర్​తో వాదించాడు.

మద్యం మత్తులో కోపగించుకున్న శంకర్.. రాజయ్య మీద అదే రాత్రి కొడవలితో దాడి చేశాడు. తీవ్రంగా గాయపడ్డ రాజయ్య అక్కడికక్కడే ప్రాణాలు విడిచాడు. కాగా.. శంకర్​ పారిపోయి.. కొద్దిసేపటి తర్వాత పోలీసులకు లొంగిపోయాడు. పోలీసులు ఘటనా స్థలానికి చేరుకొని కేసు నమోదు చేసుకొని.. దర్యాప్తు చేస్తున్నారు.

ఇవీ చూడండి:మహబూబాబాద్ జిల్లా చీకటాయపాలెంలో రోడ్డు ప్రమాదం