నకిలీ విత్తనాల ముఠా గుట్టు రట్టు

నకిలీ పత్తివిత్తనాల గుట్టును భూపాలపల్లి పోలీసులు రట్టు చేశారు. 10 లక్షల విలువ చేసే 5 క్వింటాల నకిలీ పత్తి విత్తనాలను స్వాధీనం చేసుకుని.. ముగ్గురిని అరెస్టు చేశారు.

జయశంకర్ భూపాలపల్లి జిల్లాలో నకిలీ విత్తనాల గుట్టు రట్టయింది. వరంగల్ నుంచి భూపాలపల్లి వైపు వస్తున్న ఓ కారులో నకిలీ పత్తి విత్తనాలు రవాణా చేస్తున్నారనే సమాచారం మేరకు సీసీఎస్, టాస్క్ ఫోర్స్ అధికారులు తనిఖీలు చేపట్టారు. గణపురం మండలం చెల్పూర్ జంక్షన్ వద్ద కారును తనిఖీ చేయగా రెండు గోనె సంచుల్లోని 70కేజీల లూజ్​ పత్తి విత్తనాలు కనిపించాయి. వాటిని వ్యవసాయ అధికారి పరిశీలించి నకిలీ విత్తనాలని ధృవీకరించారు. కారులో ఉన్న ముగ్గురు వ్యక్తులను విచారించగా నకిలీ విత్తనాల బండారం బయటపడింది.

ముగ్గురు నిందితులను పోలీసులు అరెస్ట్​ చేశారు. సుమారు రూ.10 లక్షల విలువైన 5క్వింటాల నకిలీ విత్తనాలతోపాటు కారు, 5 చరవాణులు, 35 వేల రూపాయల నగదును స్వాధీనం చేసుకున్నారు. ధనార్జనే ధ్యేయంగా, సులభంగా డబ్బులు సంపాదించాలనే దురాశతో నకిలీ పత్తి విత్తనాలను రైతులకు కట్టాబెట్టాలని చూసిన ముఠా గుట్టు రట్టు చేసినట్లు జిల్లా ఎస్పీ సంగ్రామ్​సింగ్​ తెలిపారు.

ఇవీ చూడండి:రూ. 10 లక్షల విలువైన ఇసుక సీజ్​ చేసిన అధికారులు