చీరలు, బ్లౌజులకు వాడే వస్తువులతో అందమైన రాఖీలు.. ఎలా అంటే..!

కరోనా కారణంగా పాఠశాలలు, కళాశాలలు మూతపడ్డాయి. పిల్లలంతా ఇళ్లకే పరిమితమయ్యారు. ఈ క్రమంలోనే పలువురు విద్యార్థులు తమలోని సృజనాత్మకతను వెలికితీస్తున్నారు. తమకు నచ్చిన పనిని.. ఇష్టంగా చేసుకుంటూ ఇతరుల మన్ననలు పొందుతున్నారు. ఇలాంటి కోవలోకే వస్తుంది జగిత్యాల జిల్లాకు చెందిన హర్షిత. అసలు విషయం ఏంటంటే..?

జగిత్యాల జిల్లా మెట్​పల్లి పట్టణంలోని రామ్​నగర్​కు చెందిన హర్షిత డిగ్రీ చదువుతోంది. కరోనా ప్రభావం వల్ల కళాశాలలకు సెలవులు ప్రకటించడంతో ఇంట్లోనే ఉంటోంది. ఈ క్రమంలోనే సమయాన్ని వృథా చేయకుండా రాఖీల తయారీపై దృష్టిసారించింది. చీరలకు, బ్లౌజులకు వినియోగించే వివిధ రకాల వస్తువులతో అందమైన రాఖీలను తయారు చేస్తూ అందరినీ ఆకట్టుకుంటోంది.

ఉలన్​దారం, సిల్కు దారం, కెమికల్ పూసలు, లేసులు, కుందన్లు తదితర వస్తువులను ఉపయోగించి.. రకరకాల డిజైన్లలో రాఖీలను తయారు చేస్తోంది హర్షిత. ఒక్కో రాఖీ తయారీకి రూ.25 వరకు ఖర్చవుతుందని.. వీటిని బయట కొనాలంటే రూ.50 వరకు వెచ్చించాల్సి వస్తుందని తెలిపింది. కొవిడ్​ కారణంగా ఇంటి వద్ద ఉంటూ.. ఇలా వివిధ రకాల డిజైన్​లలో రాఖీలు తయారుచేయడం ఎంతో సంతృప్తిగా ఉందని ఆమె హర్షం వ్యక్తం చేసింది. హర్షిత తయారు చేస్తోన్న ఈ రాఖీలను చూసిన చుట్టుపక్కల వారు.. ఆమెను అభినందించకుండా ఉండలేకపోతున్నారు.