దోమపోటు సోకిందని పంటకు నిప్పంటించిన రైతు

ఆరుగాలం కష్టపడి పండించిన పంటకు ఓ రైతు తన చేతులతోనే నిప్పంటించాడు. చూస్తుండగానే 4 ఎకరాల్లో సాగు చేసిన వరి పంటంతా కాలి బూడిదైపోయింది. అసలేమైందంటే..

జగిత్యాల జిల్లా మెట్​పల్లి మండలం ఆత్మకూరులో తుమ్మల తిరుపతి అనే రైతు తన వరి పంటకు నిప్పంటించాడు. ఆరుగాలం కష్టపడి పండించిన 4 ఎకరాల సన్నరకం వరి పంటకు దోమపోటు సోకింది. పంటంతా కోసి నూర్పిడి చేసినా క్వింటాలు ధాన్యం చేతికొచ్చే పరిస్థితి లేదు. ఈ క్రమంలోనే తీవ్ర మనస్తాపానికి లోనైన తిరుపతి.. తన చేతులతోనే పంటకు నిప్పంటించాడు.

ప్రభుత్వ ఆదేశాల మేరకు సన్నరకం వరి సాగుచేస్తే దోమపోటుతో పంటంతా నాశనం అయ్యిందని రైతు ఆవేదన వ్యక్తం చేశాడు. ప్రభుత్వమే తమను ఆదుకోవాలని వేడుకుంటున్నాడు.