హైదరాబాద్​లో వర్షం: జూపార్కులో మహిళ మృతి

హైదరాబాద్​లో కురుస్తున్న అకాల వర్షానికి పలు ప్రాంతాలు జలదిగ్బంధం అయ్యాయి. నెహ్రూ జంతు ప్రదర్శనశాలలో ఈదురు గాలులతో కూడిన వర్షానికి వృక్షం నేలకూలి ఓ మహిళ ప్రాణాలొదిలింది.

అకాల వర్షానికి హైదరాబాద్​లోని పలు ప్రాంతాలు తడిసి ముద్దయ్యాయి. ఎల్బీ నగర్, దిల్​సుఖ్​నగర్​తో పాటు పాతబస్తీలోని పలు ప్రాంతాల్లో ఈదురు గాలులతో కూడిన వర్షం పడింది. ప్రధాన రహదారుల్లో వర్షం నీరు చేరడంతో ట్రాఫిక్​కు అంతరాయం కలిగింది. నెహ్రూ జంతు ప్రదర్శనశాలలో ఈదురు గాలుల ధాటికి సుమారు 50 వృక్షాలు నేలకూలాయి.

ఈదురు గాలులతో వర్షం కురుస్తున్న సమయంతో జూపార్క్​లో ఉన్న సందర్శకులను సిబ్బంది బ్యాటరీ వాహనాల ద్వారా బయటకు తీసుకువచ్చారు. జూపార్కులో వర్షానికి చెట్టు కిందకు చేరుకున్న సందర్శకులపై వృక్షం పడి మనికొండకు చెందిన నిఖాతా ఫాతిమా అనే 60ఏళ్ల మహిళ మృతి చెందింది. మరో 15 మంది స్వల్ప గాయాలతో బయటపడ్డారు. వెంటనే స్పందించిన ప్రభుత్వం మృతురాలి కుటుంబానికి రూ.5లక్షల పరిహారం ప్రకటించింది.

పార్కింగ్ ప్రదేశాల్లో, బ్యాటరీ వాహనాలు తిరిగే దారుల్లో ఎక్కవ శాతం చెట్లు కొమ్మలు కూలిపోయాయన్నారు అదనపు అటవీ సంరక్షులు మునీంద్ర. పార్కును రేపటిలోగా సందర్శకులకు అందుబాటులోకి తెస్తామని అధికారులు తెలిపారు.

ఇవీ చూడండి:'సీజేఐపై ఆరోపణలు అసత్యం, కల్పితం'