'విజయ'కు గడ్డుకాలం... గట్టెక్కించేందుకు విశ్వప్రయత్నం

విజయడెయిరీ సంస్థ నేల చూపులు చూస్తోంది. ప్రైవేటు డెయిరీల నుంచి పెరుగుతున్న పోటీతో పాల సేకరణ దాదాపు 50 శాతానికి పడిపోయింది. అన్ని జిల్లాల్లో డెయిరీ పార్లర్ల ఏర్పాటుకు సర్కారు సన్నద్ధమవుతున్న తరుణంలో... తాజాగా నెలకొన్న ప్రతికూల పరిణామాలు ఆందోళన కలిగిస్తున్నాయి. పాడి రైతులకు అన్ని రకాలుగా ప్రోత్సాహం అందిస్తున్నా... సేకరణ తగ్గటంపై ప్రభుత్వం అప్రమత్తమైంది.

గతంలో ఎన్నడూ లేనంతగా విజయ డెయిరీలో పాల సేకరణ 50 శాతానికి పడిపోయింది. రోజుకు సగటున 4 లక్షల లీటర్ల పాలు సేకరించాల్సి ఉండగా... ప్రస్తుతం రోజుకు 2 లక్షల లీటర్లు మాత్రమే వస్తున్నాయి. దేశవ్యాప్తంగా పాల సేకరణ 10 శాతం తగ్గితే... ఒక్క విజయ డెయిరీలోనే సగానికి పడిపోవడం సర్వత్రా ఆందోళన కలిగిస్తోంది.

రానున్న రోజుల్లో మరింత కష్టం...

రాయితీపై పాడి పశువుల పంపిణీ, లీటరుపై 4 రూపాయల ప్రోత్సాహం, రూ.129 కోట్ల విలువైన దాణా పంచుతున్నా... సేకరణ తగ్గడాన్ని ప్రభుత్వం తీవ్రంగా పరిగణిస్తోంది. అనూహ్య వాతావరణ మార్పులు పాడి పరిశ్రమపై ప్రతికూల ప్రభావం చూపుతున్నాయి. చలికాలం ముగియక ముందే ఉష్ణోగ్రతలు పెరగటం వల్ల ఆవులు, గేదెలు ఎదకు రావడం లేదు. కృత్రిమ గర్భధారణ ప్రయత్నాలు చాలా వరకు విఫలమవుతున్నాయి. ఇలాంటి పరిస్థితుల వల్ల రానున్న రోజుల్లో పాల సేకరణ మరింత కష్టసాధ్యమని నిపుణులు హెచ్చరిస్తున్నారు.

ఆసక్తి చూపని రైతులు..

ప్రైవేటు డెయిరీల నుంచి పోటీ విపరీతంగా పెరిగిపోయింది. లీటర్ పాలకు విజయడైరీ రూ.30 నుంచి 60 వరకు చెల్లిస్తుంటే... అదే ప్రైవేటు డెయిరీలు మాత్రం రూ.35 నుంచి 70 మధ్య చెల్లిస్తున్నాయి. పైగా ఇంటి వరకు వచ్చి పాలను కొంటున్నాయి. రైతులే స్వయంగా అమ్ముకుంటే లీటరుకు రూ.80 వరకు వస్తుండటం వల్ల విజయ డెయిరీకి పాలు పోసేందుకు రైతులు ఆసక్తి చూపడం లేదు. అదనపు ప్రోత్సాహం చెల్లింపులో జాప్యం, పాడి పశువుల పంపిణీలో చోటుచేసుకున్న అక్రమాలు, క్షేత్రస్థాయిలో ప్రైవేటు డెయిరీలతో కుమ్మక్కవుతోన్న కొంతమంది అధికారుల వ్యవహారశైలి పాల సేకరణకు పెద్ద తలనొప్పిగా మారింది.

సేకరణ చర్యలు...

రాష్ట్రవ్యాప్తంగా పది మిల్క్ షెడ్ల నుంచి ప్రస్తుతం 2,03,000 లీటర్ల పాలు మాత్రమే వస్తున్నాయి. పాల సేకరణ పడిపోవటం వల్ల దిద్దుబాటు చర్యలు వేగవంతమయ్యాయి. సేకరణ పెంచేందుకు చర్యలు తీసుకోవాలని ఇటీవల ఆదేశాలు రాగా... క్షేత్రస్థాయిలో కసరత్తు ప్రారంభమైంది. ఇప్పటి వరకు సుమారు 300 లీటర్ల లభ్యత ఉన్న గ్రామాల్లో మాత్రమే పాలు సేకరించిన విజయ డెయిరీ... 20 నుంచి 40 లీటర్లు ఉన్న గ్రామాల్లోనూ పాలు సేకరించేందుకు సిద్ధమవుతోంది.

వినియోగదారుల డిమాండ్ మేరకు ప్రైవేటు పాల వ్యాపారుల నుంచి రోజుకు 2 లక్షల లీటర్లు కొనుగోలు చేస్తున్నామని విజయ డెయిరీ మేనేజింగ్ డైరెక్టర్ శ్రీనివాసరావు అన్నారు. సేకరణ పెంచేందుకు అవసరమైన అన్ని చర్యలు తీసుకుంటున్నామని ఎండీ పేర్కొన్నారు.

ఇవీ చూడండి:మేడారం జాతరలో కృత్రిమ మేధ సఫలీకృతం