కారు ఫుల్ అయింది .. లొల్లి మొదలైంది! మున్సిపాలిటీలు, కార్పొరేషన్లలో అభ్యర్థులకు టికెట్ల కేటాయింపు తెరాసకు సవాల్గా మారింది. ఒక్కో వార్డు నుంచి దాదాపు పది మంది ఆశావహులు ఉన్నారు. తమకు అవకాశం ఇవ్వాలంటూ మంత్రులు, ఎమ్మెల్యేలు, ఎంపీల చుట్టూ తిరుగుతున్నారు. కొందరు నేరుగా కేటీఆర్ను కలిసి కోరుతున్నారు. పనైతే చేయడంటూ అందరికీ నేతలు హామీ ఇస్తుండటంతో... అందరూ ఆశతో ఉన్నారు.
ఒక్కో స్థానం నుంచి ముగ్గురు ఎంపిక
మున్సిపాలిటీలు, కార్పొరేషన్ల నుంచి తెప్పించుకున్న నివేదికల్లోనూ... అసమ్మతి సెగలు ఉండే అవకాశం ఉందని అధిష్ఠానానికి హెచ్చరికలు అందినట్లు తెలుస్తోంది. రిజర్వేషన్లు ఖరారైతే.. కొందరు వెనక్కి తగ్గే అవకాశం ఉండనుంది. రిజర్వ్ స్థానాల్లోనూ పోటీ తీవ్రంగానే ఉంటుందని అంచనా వేస్తున్నారు. ఒక్కో వార్డు, డివిజన్ నుంచి.. ఒక్కో రిజర్వేషన్ కేటగిరీలో ముగ్గురు పేర్లను సిద్ధం చేసినట్లు తెలుస్తోంది. ఇతర పార్టీల్లోనూ చురుకైన నేతలు ఉంటే వారికి కూడా చివరి నిమిషంలో గులాబీ కండువా కప్పాలని ఆలోచిస్తున్నారు.
అందరినీ కలుపుకొని పోవాలి...
ఆశావహుల మధ్య సర్దుబాట్లు చేయాల్సిన బాధ్యత స్థానిక ఎమ్మెల్యేలు, మంత్రులదేనని పార్టీ అధినేత కేసీఆర్ స్పష్టం చేశారు. అసంతృప్తి ఏర్పడకుండా చూసుకోవాలని పేర్కొన్నారు. టికెట్ల కేటాయింపు వివాదాస్పదంగా మారకుండా జాగ్రత్త పడాలని సూచించారు. ముందు నుంచి పార్టీలో ఉన్న వారు.. కొత్తగా చేరిన వారూ.. పార్టీకి సమానమేనని.. అందరినీ కలుపుకొని సమన్వయంతో ఎన్నికలను ఎదుర్కోవాలని పార్టీ శ్రేణులకు కేటీఆర్ దిశానిర్దేశం చేశారు. జిల్లా స్థాయిలో సర్దుబాటు కాని పక్షంలో అధిష్ఠానం దృష్టికి తీసుకొస్తే పరిష్కరిస్తామని నేతలకు సర్దిచెప్పారు.
పార్టీలో కష్టపడుతున్న వారందరికీ అవకాశాలు తప్పకుండా వస్తాయని.. టికెట్ దక్కని వారికి ఎన్నికల అనంతరం భర్తీ చేయనున్న నామినేటెడ్ పోస్టుల్లో అవకాశాలు ఉంటాయని మంత్రులు, ఎమ్మెల్యేల ద్వారా కేటీఆర్ సంకేతాలు పంపిస్తున్నారు.
ఇవీచూడండి: గెలవకపోతే మంత్రి పదవి ఊడుతుంది... జాగ్రత్త..!
