ప్రభుత్వం మారింది... బతుకు భారమైంది

అతను ఒక సామాన్య రైతు. ఊరు బాగుంటే చాలనుకున్నాడు. ప్రభుత్వ చేయూతనిస్తుండటంతో కాంట్రాక్ట్ పనులు చేయటం మెుదలుపెట్టాడు. అంతవరకు సక్రమంగానే జరిగింది. ప్రభుత్వం మారింది... అతను అప్పుల పాలయ్యాడు. పెన్ను పట్టించాల్సిన తన పిల్లల చేత.. లారీ స్టీరింగ్ పట్టించాడు.

ఏపీలోని పశ్చిమ గోదావరి జిల్లా తాడేపల్లిగూడెం మండలం కొత్తూరు గ్రామానికి చెందిన కూడవల్లి హనుమంతరావు ఓ సామాన్య రైతు. ఈయనకు ఇద్దరు కుమారులు. గత ప్రభుత్వ హయాంలో కోటి 20 లక్షల రూపాయల నిధులతో పంచాయతీ భవనం, డంపింగ్ యార్డ్, అండర్ గ్రౌండ్ డ్రైనేజీ సిస్టం, కల్యాణ మండపం నిర్మాణాలు చేపట్టి మంచి పేరు సంపాదించుకున్నాడు. ఈ క్రమంలోనే సుమారు రెండు కిలోమీటర్ల మేర ఉన్న రహదారి పనులు రూ.30 లక్షలకు పూర్తి చేశారు.

ప్రభుత్వం మారడంతో వీరి కుటుంబ జీవన విధానం పూర్తిగా మారిపోయింది. రూ.30 లక్షలకు సంబంధించిన బిల్లులు రాక నివాసం ఉంటున్న ఇంటిని రూ.10 లక్షలకు తాకట్టుపెట్టాడు. చదివించాల్సిన కుమారులతో... కూలీ పనులకు పంపించి కుటుంబ జీవనం సాగిస్తున్నాడు. రేషన్ బియ్యం కొనుక్కొని అదే పరమాన్నంగా.. బతుకు బండి ఈడుస్తున్నాడు. ఈ క్రమంలోనే తనకు రావాల్సిన సొమ్ము వస్తే గ్రామంలో తలెత్తుకు తిరగ గలనని, లేనిపక్షంలో మరింత సంక్షోభంలో పడిపోతానని హనుమంతరావు తన ఆవేదన వ్యక్తం చేశాడు.

ఇదీ చదవండి:'మధ్యమానేరు ముంపు బాధితుల సమస్యలు చట్టసభల్లో ప్రస్తావిస్తాం'