నేషనల్ మ్యూజియంలో నిజాం ఆభరణాలు హైదరాబాద్ నిజాం నగల ధగధగలు మరోసారి దిల్లీవాసులను అలరించనున్నాయి. ఇక్కడి నేషనల్ మ్యూజియంలో కేంద్ర సాంస్కృతిక శాఖ మంత్రి మహేశ్శర్మ ఈ ఆభరణాల ప్రదర్శన ప్రారంభించారు. ఇలాంటి అరుదైన ప్రదర్శనల ద్వారా దేశ సాంస్కృతిక వైభవాన్ని ప్రజల ముందు ఆవిష్కరించే యత్నం చేస్తున్నామన్నారు.
ఈ మ్యూజియంలో వీటిని ప్రదర్శించటం ఇది మూడోసారి. ఇంతకుముందు హైదరాబాద్లో రెండుసార్లు ప్రదర్శించారు. ఈ ఆభరణాల్లో వజ్రాలు పొదిగిన కంకణాలు, గాజులు, చెవిపోగులు, కవచాలు, ఉంగరాలు, నెక్లెస్లు, వడ్డానం, బెల్టుల వంటి 173 రకాల నగలు ఉన్నాయి. కళ్లుచెదిరే 184.75 క్యారెట్ల జాకబ్ డైమాండ్ ప్రత్యేక ఆకర్షణ. ప్రపంచంలోని అతి పెద్ద వజ్రాల్లో ఇది ఒకటి. ఈ నెల 19 నుంచి మే 5 వరకు ప్రజలను వీటి సందర్శనకు అనుమతిస్తారు.
