Telangana projects: అనుమతుల్లేని జాబితాలో ప్రాజెక్టులు... ముగుస్తున్న గడువు

Telangana projects: అనుమతుల్లేని ప్రాజెక్టుల విషయంలో తదుపరి ఏం జరగబోతోందన్నదే చర్చనీయాంశమైంది. అనుమతుల కోసం కేంద్రం ఇచ్చిన ఆర్నెళ్ల గడువు మరో మూడ్రోజుల్లో ముగియనుంది. డీపీఆర్​లు పంపి ఐదు నెలలు అయినా... అనుమతులు ఇవ్వకుండా నాన్చుతున్నారని రాష్ట్ర ప్రభుత్వం ఆరోపిస్తుంది. డీపీఆర్​లు సరిగ్గా లేవని కేంద్రం జలశక్తి శాఖ అంటోంది.

Telangana projects: విభజన చట్టానికి లోబడి కృష్ణా, గోదావరి నదులపై తెలుగు రాష్ట్రాల్లో ఉన్న ప్రాజెక్టుల నిర్వహణ కోసం నదీ యాజమాన్య బోర్డులను ఏర్పాటు చేశారు. సుదీర్ఘ కసరత్తు అనంతరం బోర్డుల పరిధిని ఖరారు చేస్తూ గత జులై 15న కేంద్ర జలశక్తి శాఖ గెజిట్ నోటిఫికేషన్ జారీ చేయగా... అక్టోబర్ 14 నుంచి అమల్లోకి వచ్చింది. రెండు రాష్ట్రాలు ఏ ఒక్క ప్రాజెక్టును బోర్డులకు స్వాధీనం చేయలేదు. అనుమతుల్లేని ప్రాజెక్టులను గెజిట్ నోటిఫికేషన్‌లో ప్రత్యేకంగా ప్రస్తావించిన కేంద్రం... వాటికి ఆర్నెళ్లలోగా అనుమతులు తీసుకోవాలని పేర్కొంది. ఈ నెల 14వ తేదీతో ఆ గడువు ముగియనుంది.

కృష్ణా, గోదావరిపై రాష్ట్రం చేపట్టిన పలు ప్రాజెక్టులు అనుమతుల్లేని జాబితాలో ఉన్నాయి. పాలమూరు - రంగారెడ్డి, కాళేశ్వరం అదనపు టీఎంసీ, సీతారామ, సమ్మక్క సాగర్, డిండి, చనకా - కొరాటా, మొడికుంటవాగు, తుమ్మిళ్ల, ప్రాణహిత, రామప్ప-పాకాల లింక్, కందకుర్తి, గూడెం ఎత్తిపోతల తదితర ప్రాజెక్టులు ఇందులో ఉన్నాయి.

డీపీఆర్​ల సమర్పణ...

కృష్ణాకు సంబంధించి రాష్ట్రానికి నీటి కేటాయింపులు చేయాలని కోరుతున్న ప్రభుత్వం ఆ అంశాన్ని ట్రైబ్యునల్‌కు నివేదించాలని పేర్కొంది. గోదావరి ప్రాజెక్టులకు సంబంధించి అనుమతులు పొందే ప్రక్రియను ప్రారంభించింది. కేంద్ర జలసంఘం జీఆర్​ఎంబీకి ప్రాజెక్టుల డీపీఆర్​లు సమర్పించింది. సీతారామ, ముక్తేశ్వర, చౌటుపల్లి హన్మంత్ రెడ్డి ఎత్తిపోతల పథకాలు, చనాఖా- కొరాటా ఆనకట్ట, సమక్కసాగర్, మోడికుంటవాగు ప్రాజెక్టుల డీపీఆర్​లు ఇచ్చారు. ప్రాణహిత ప్రాజెక్టు డీపీఆర్​ తయారీ దశలో ఉంది.

ఇప్పటికే ఉన్న ప్రాజెక్టుల్లో భాగంగా ఉన్నందున కాళేశ్వరం అదనపు టీఎంసీ, రామప్ప-పాకాల లింక్, గూడెం, కందకుర్తి ఎత్తిపోతలతో పాటు కంతనపల్లిని గెజిట్ నోటిఫికేషన్ నుంచి తొలగించాలని రాష్ట్ర ప్రభుత్వం కేంద్రాన్ని కోరింది. ఇవన్నీ ప్రస్తుతం వివిధ దశల్లో ఉన్నాయి. డీపీఆర్​ల ఆమోదం, అనుమతుల కోసం ఇంజినీర్ల బృందాన్ని ఏర్పాటు చేసి దిల్లీలోనూ ఓ వ్యవస్థను నెలకొల్పి ప్రత్యేకంగా పర్యవేక్షిస్తున్నారు.

సీఎం ఆగ్రహం...

ఐదు నెలలు గడిచినా అనుమతులు రాకపోవడంపై ఆదివారం నిర్వహించిన సమీక్షలో ముఖ్యమంత్రి ఆగ్రహం వ్యక్తం చేసినట్లు తెలిసింది. అవసరమైతే సీడబ్యూసీ, జీఆర్​ఎంబీ అధికారులతో వ్యక్తిగతంగా మాట్లాడతానని చెప్పినట్లు సమాచారం. అనుమతులు సహా గెజిట్‌ నుంచి ఐదు ప్రాజెక్టుల తొలగింపు ప్రక్రియ వేగవంతం అయ్యేలా చూడాలని అధికారులను ఆదేశించారు. అయితే డీపీఆర్​లు తగిన విధంగా లేవని... లోపాలు ఉన్నాయని కేంద్రం పేర్కొంది.

గెజిట్​లో పేర్కొన్న గడువులోగా ప్రాజెక్టులకు అనుమతులు వచ్చే అవకాశం లేదు. దీంతో తదుపరి ఏం చేస్తారన్న విషయమై ప్రస్తుతం చర్చ జరుగుతోంది. కేంద్రం పొడిగింపు ఇవ్వక తప్పదని ప్రభుత్వ వర్గాలు, నిపుణులు చెబుతున్నారు.

ఇదీ చదవండి:వైద్య సిబ్బంది 'టీకా' సాహసం- భారీ హిమపాతంలోనూ విధులకు...