'మానవ రహిత పారిశుద్ధ్య పనులు ఆదర్శనీయం'

జలమండలి చేపడుతున్న మానవ రహిత పారిశుద్ధ్య పనులను జాతీయ సఫాయి కర్మచారి కమిషన్​ ఛైర్మన్​ మన్హర్​ వాల్జిభాయి జాలా, జలమండలి ఎండీ దానకిశోర్​ పరిశీలించారు. కార్మికులకు అన్ని రకాల సదుపాయాలు అందుతున్నాయా లేదా అని వాల్జిభాయి ఆరా తీశారు.

జలమండలి చేపడుతున్న మానవ రహిత పారిశుద్ధ్య పనులను జాతీయ సఫాయి కర్మచారి కమిషన్ ఛైర్మన్ మన్హర్ వాల్జిభాయి జాలా, సభ్యుడు జగదీష్ హిరేమణి, జలమండలి ఎండీ దానకిశోర్​తో కలిసి హైదరాబాద్​ ఖైరతాబాద్​లో క్షేత్రస్థాయిలో పర్యటించారు. అలాగే జలమండలి మినీ ఎయిర్ టెక్ యంత్రాలతో చేపడుతున్న క్లీనింగ్, జెట్టింగ్, వ్యర్థాలను పారబోయడం, అలాగే భారీ ఎయిర్ టెక్ యంత్రాలతో సక్కింగ్ పనులను వారు పరిశీలించారు. జలమండలి మానవ రహిత పారిశుద్ధ్య పనుల కోసం మినీ ఎయిర్ టెక్ యంత్రాలను రూపొందించి వినియోగంలోకి తీసుకువచ్చిందని ఎండీ దానకిషోర్‌ తెలిపారు. అంతేకాకుండా కార్మికులు మ్యాన్​ హోళ్లలోకి దిగకుండా సెవరెజీ పనులపై ఎప్పటీకప్పుడు వర్క్ షాపులు నిర్వహిస్తూ, సాంకేతిక పరిజ్ఞానంతో పాటు పరికరాలను సమకూరుస్తున్నామని ఆయన వివరించారు.

జలమండలి కార్మికులకు అందిస్తున్న ఆక్సిజన్ మాస్క్​లు, గ్యాస్ డిటెక్టర్, సిల్ట్ గ్లాబర్, గ్లౌస్​తోపాటు పలు రకాల పనిముట్లను సఫాయి కర్మచారి ఛైర్మన్ మన్హర్‌ వాల్జిభాయి జాలా పరిశీలించారు. ఆ పనిముట్లు ఏ విధంగా పనిచేస్తాయని వివరాలు అడిగి తెలుసుకున్నారు. అంతే కాకుండా కాలానుగుణంగా కార్మికులు శుభ్రం చేసుకోవడానికి సబ్బులు, నూనెలు అందుతున్నాయా లేదా అని ఆరా తీశారు. కార్మికుల వేతనాలు సరైన సమయంలో అందడం, ఈఎస్ఐ సదుపాయాలపై కూడా అడిగి తెలుసుకున్నారు. ఈ వివరాలతో సంతృప్తి చెందిన ఛైర్మన్ ఈ ప్రక్రియ అద్భుతంగా, ఆదర్శనీయంగా ఉందన్నారు. అనంతరం అంబర్ పేట్ ఎస్టీపీని సందర్శించారు. ఈ కార్యక్రమంలో జలమండలి ఆపరేషన్స్-1 డైరెక్టర్ అజ్మీరా కృష్ణ, సీజీఎమ్ పలువురు అధికారులు పాల్గొన్నారు.

ఇవీ చూడండి: మద్యం టెండర్లకు భలే గిరాకీ..