Rajendranagar Murder Case Update : ఒకరితో ప్రేమ.. మరొకరితో పెళ్లి.. రాహుల్​ హత్యకు కారణం అదేనా..?

Rajendranagar Murder Case Update : గుర్తు తెలియని వ్యక్తుల చేతిలో దారుణ హత్యకు గురైన రాజేంద్రనగర్​కు చెందిన రాహుల్ కేసులో.. ఇద్దరు అనుమానితులను పోలీసులు అదుపులోకి తీసుకున్నారు. హత్యకు ప్రేమ వ్యవహారమే కారణమా అన్న కోణంలో దర్యాప్తు చేస్తున్నారు.

Rajendranagar Murder Case Update : రాజేంద్రనగర్​లోదారుణహత్యకుగురైన రాహుల్ కేసులో ఇద్దరు అనుమానితులను పోలీసులు అదుపులోకి తీసుకున్నారు. మంగళవారం రాత్రి రాజేంద్రనగర్ పోలీస్ స్టేషన్ పరిధిలోని బండ్లగూడలో ఉన్న సెలబ్రిటీ జిమ్ నుంచి బయటకు వస్తున్న రాహుల్​(Rahul)ను ముగ్గురు దుండగులు రెక్కీ నిర్వహించి హత్య చేసిన ఘటన తెలిసిందే. నిందితుల కోసం పోలీసులు నాలుగు బృందాలుగా ఏర్పడి గాలిస్తున్నారు. ఈ క్రమంలోనే ఇద్దరు అనుమానితులను అదుపులోకి తీసుకున్నారు.

రాహుల్​కు సమీప బంధువుల అమ్మాయితో ప్రేమ వ్యవహారం కొనసాగినట్లు సమాచారం. కాగా ఇటీవల వేరే యువతితో రాహుల్​కు పెళ్లి నిశ్చయం కావడంతో హత్యకు దారితీసి ఉంటుందా అన్నకోణంలో పోలీసులు దర్యాప్తు చేస్తున్నారు. ఆమెను చేసుకున్నా.. తనను కూడా వివాహం చేసుకోవాలని రాహుల్​ను అతని బంధువుల యువతి కోరగా.. ఈ విషయాన్ని సెటిల్ చేసేందుకు అజహర్ అనే మధ్యవర్తికి రాహుల్ రూ.4 లక్షలు ఇచ్చినట్లుగా సమాచారం. సెటిల్​మెంట్​లో ఎలాంటి పురోగతి లేకపోవడంతో అజహర్​ను డబ్బులు వెనక్కి ఇవ్వాలని రాహుల్ కోరాడని అతని బంధువులు చెబుతున్నారు.

ఈ క్రమంలోనే మంగళవారం రాత్రి జిమ్ ​వద్ద పెప్పర్ స్ప్రే(PAPPER SPRY) కొట్టి రాహుల్​ను హత్య చేసి నిందితులు పరారయ్యారు. ఇద్దరు వ్యక్తులు హత్య చేయగా.. మరో వ్యక్తి ద్విచక్ర వాహనంపై బయట నిల్చుని ఉన్నట్లు సీసీటీవీ కెమెరాల ఆధారంగా పోలీసులు గుర్తించారు. నిందితుల కోసం గాలిస్తున్నారు. ఉస్మానియా ఆస్పత్రిలో రాహుల్ మృతదేహానికి పోస్టుమార్టం పూర్తి కాగా.. అనంతరం వారి బంధువులకు అప్పగించారు. పోలీసులు వారి స్టేట్​మెంట్​ను రికార్డు చేశారు. రాహుల్ సెల్​ఫోన్​ను పోలీసులు స్వాధీనం చేసుకుని దర్యాప్తు చేస్తున్నారు.

Vamshi Murder Case in Jagtial : ఇటీవల జగిత్యాల జిల్లాలోనూ ఇలాంటి ఘటనే జరిగింది. బీర్​పూర్ మండల కేంద్రానికి చెందిన వంశీ అనే యువకుడు స్థానికంగా ఉన్న ఓ గ్రామ యువతితో ప్రేమ వ్యవహారం నడిపాడు. ఈ విషయం యువతి ఇంట్లో వారికి తెలిసిన కొద్ది రోజులకే ఆమెకు మరో వ్యక్తితో వివాహం జరిపించారు. అయినప్పటికీ వంశీ, ఆ యువతి తరచూ ఫోన్‌లో మాట్లాడుకోవడం, కలుసుకోవడం చేస్తున్నారని యువతి కుటుంబసభ్యులు అనుమానం పెంచుకున్నారు. దీంతో అతడిని పలుమార్లు హెచ్చరించారు. అయినా అతడిలో మార్పు కనిపించడం లేదనే కోపంతో వారు హత్య చేయాలని నిశ్చయించుకున్నారు.

అందుకోసం పథకం రచించి.. సమయం కోసం ఎదురు చూశారు. వంశీ కొల్వాయి నుంచి బైక్​పై తుంగూర్​కు వస్తుండగా ఇద్దరు వ్యక్తులు అతడిని అడ్డగించారు. వారి వద్దనున్న గొడ్డలి, ఇతర ఆయధాలతో విచక్షణా రహితంగా దాడికి దిగారు. ఆ తరువాత అక్కడి నుంచి పరారయ్యారు. తలకు తీవ్రగాయాలు కావడంతో అతడు అక్కడికక్కడే మృతి చెందాడు. విషయం తెలుసుకున్న మృతుడి బంధువులు అక్కడికి చేరుకుని నిందితులను తమకు అప్పగించాలని ఆందోళనకు దిగారు. మృతదేహాన్ని తరలించేందుకు పోలీసులు ప్రయత్నించగా..మృతుడి బంధువులు అక్కడే ఉన్న లారీ కిందపడుకుని తమకు న్యాయం జరిగేంతవరకు కదలనివ్వబోమని నిరసన వ్యక్తం చేశారు. నిందితులకు చట్టపరంగా శిక్షపడేలా చూస్తామని హామీ ఇవ్వడంతో చివరకు శాంతించారు.