సతీశ్​ బాబు హత్య కేసును ఛేదించిన పోలీసులు

హైదరాబాద్​లో కలకలం రేపిన సాఫ్ట్‌వేర్ సంస్థ ఎండీ సతీశ్​ బాబు హత్య కేసును పోలీసులు ఛేదించారు. మిత్రుడు హేమంతే పథకం ప్రకారం సతీష్‌ను దారుణంగా అంతమొందించినట్లు తేల్చారు. హత్యను ప్రమాదంగా చిత్రీకరించేందుకు నిందితుడు యత్నించిన్నట్లు మాదాపూర్ డీసీపీ వెంకటేశ్వర్‌రావు తెలిపారు.

ప్రకాశం జిల్లా మార్టూరు గ్రామానికి చెందిన సతీశ్​ బాబు హైదరాబాద్‌లోని ముసాపేట్‌లో నివాసముంటూ సాఫ్ట్‌వేర్ సంస్థను నిర్వహిస్తున్నాడు. అతని మిత్రుడు భీమవరానికి చెందిన హేమంత్ కొంతకాలంగా సతీశ్​ వద్దనే పనిచేస్తూ సంస్థలో భాగస్వామ్యం కలిగి ఉన్నాడు. వారి సంస్థలో పనిచేసే ప్రియాంక హేమంత్​తో చనువుగా ఉండేది. ప్రియాంకతో కలిసి చనువుగా ఉండవద్దని హేమంత్‌ను పలుమార్లు సతీశ్​ హెచ్చరించాడు. సాఫ్ట్‌వేర్ సంస్థ నష్టాల్లో ఉండడం వల్ల హేమంత్‌కు ఇచ్చే వేతనం తగ్గించాడు.

ప్రణాళికతోనే హత్య

ఇదంతా మనసులో పెట్టుకున్న హేమంత్​.. సతీశ్​ను హత్య చేయాలని నిర్ణయించుకున్నాడు. గత నెల 28న ఇద్దరు హేమంత్ ఇంటి వద్ద మద్యం సేవించారు. మత్తులో ఉన్న సతీశ్​ను హేమంత్​ ఇనుప సుత్తితో తలపై మోదీ చంపేశాడు. హత్యను ప్రమాదంగా చిత్రీకరించడానికి ప్రయత్నించినట్లు మాదాపూర్ డీసీపీ వెంకటేశ్వర్‌రావు తెలిపారు. పరారీలో ఉన్న నిందితుడు హేమంత్‌ను అరెస్టు చేసి రిమాండ్​కు తరలించినట్లు చెప్పారు. ఈ ఘటనలో ప్రియాంక ప్రమేయం, హేమంత్​కు ఇంకెవరైనా సహకరించారా అనే అంశాలపై విచారణ చేస్తున్నామని డీసీపీ వివరించారు.

ఇవీ చూడండి : లక్షల్లో లావాదేవీలు... కోట్లలో స్వాహా