రాములో.. రాములా స్టెప్పు.. పోలీసులేస్తే..

రాములో... రాములా అంటూ అల్లూ అర్జున్ స్టెప్పులేసిన పాట ఎంత వైరల్ అయిందో.... అదే పాటను కరోనా వైరస్​పై అవగాహన కలిగించేందుకు ఏపీలోని విజయనగరం జిల్లా పార్వతీపురం పోలీసులు చేసిన వీడియో.. అంతే వైరల్ అవుతోంది.

మీరు రాములో.... రాముల పాటను చూశారా? చూశారా అని కాదు... ఎన్నిసార్లు చూశారు అని అడగండి అంటారేమో...! ఆగండి... ఆగండి... మీరు చూసింది హీరో అల్లు అర్జున్ వేసిన దోశ స్టెప్పు... ఇప్పుడు చూస్తున్నది రియల్ హీరోస్ వేసిన దోశ స్టెప్పు. అదేనండి... పోలీసులు వేసిన దోశ స్టెప్పు... కాదు...కాదు... కరోనా స్టెప్పు.

కరోనా మహమ్మారి నియంత్రణకు మేము సైతం అంటూ ఏపీలోని విజయనగరం జిల్లా పార్వతీపురం పోలీసులు తమ వంతు ప్రయత్నం చేశారు. కరచాలనం వద్దు... నమస్కారం ముద్దంటూ... పరిశుభ్రత ఆవశ్యకతను తెలియజేస్తూ డ్యాన్స్ చేశారు. ఈ వీడియో ఇప్పుడు వైరల్​గా మారింది.