దయనీయంగా మారిన వృద్ధాశ్రమాల పరిస్థితి

కరోనా తీవ్రత ప్రపంచాన్నే కుదిపేస్తోంది. ఒకటి కాదు.. రెండు కాదు.. అన్ని రంగాలపై దీని ప్రభావం పడింది. రాష్ట్రంలో వృద్ధాశ్రమాలు, అనాథశ్రమాల పరిస్థితి దయనీయంగా మారింది. ఆదుకునే వారి కోసం వృద్ధాశ్రమాలు, అనాథశ్రమాల నిర్వాహకులు దీనంగా ఎదురుచూస్తున్నారు. ఆయా ఆశ్రమాల్లో ఉంటున్న వారి పరిస్థితి దయనీయంగా మారింది. సిబ్బందికి జీతాలివ్వలేక నిర్వాహకులు చేతులెత్తేస్తున్నారు. రాబోయే రోజుల్లో ఇంకా ఎలా ఉంటుందోనని వారు ఆందోళన చెందుతున్నారు.

హైదరాబాద్‌, మేడ్చల్‌, రంగారెడ్డి జిల్లాల్లో వేయికి పైగా వృద్ధాశ్రమాలు, అనాథశ్రమాలున్నాయి. నెలలో సగం రోజులు దాతల సాయంతోనే కొనసాగేవి. కరోనా నేపథ్యంలో రెండు నెలల నుంచి పరిస్థితి అగమ్యగోచరంగా మారింది. దాతలు రాకపోవడం వల్ల పరిస్థితి దయనీయంగా తయారైంది. అద్దెలు కట్టలేక సిబ్బందికి జీతాలు ఇవ్వలేక నిర్వాహకులు చేతులెత్తేస్తున్నారు. రాబోయే రోజుల్లో పరిస్థితి మరీ అధ్వాన్నంగా ఉంటుందని ఆశ్రమాల నిర్వాహకులు ఆందోళన చెందుతున్నారు. కొన్ని చోట్ల పోలీసులు ఆపన్నహస్తం అందిస్తుండగా.. మరికొన్ని చోట్ల అసలు ఆశ్రమాల వైపు ఎవరూ చూడడం లేదని పలువురు నిర్వాహకులు ఆవేదన వ్యక్తం చేస్తున్నారు.

అధ్వాన్నంగా పరిస్థితి..

నెలలో 15 రోజులు ఇవి దాతల సాయంతోనే గడిచిపోయేవి. లాక్‌డౌన్ నేపథ్యంలో రెండు నెలల నుంచి పరిస్థితి అధ్వాన్నంగా మారింది. ప్రతి నెల అందే నిత్యావసరాలు పంపిణీ నిలిచిపోయింది. విరాళాలు ఆగిపోయాయి. పుట్టినరోజు, పెళ్లిరోజు వేడుకల సందర్భంగా భోజనాలు పెట్టేందుకు ఎవరూ ముందుకు రాకపోవడం వల్ల పరిస్థితి దయనీయంగా తయారైంది. కొందరు నిర్వాహకులు అప్పులు చేసి మరీ ఆశ్రమాల్లో ఉంటున్న వారి ఆకలి తీరుస్తున్నారు. అధిక శాతం ఆశ్రమాలు అద్దె భవనాల్లోనే కొనసాగుతున్నాయి.

నిర్వాహకులు పడరాని పాట్లు

ప్రతి నెల 50 వేల రూపాయల నుంచి లక్ష రూపాయల వరకు అద్దె చెల్లించాల్సి ఉంటుంది. విరాళాలు ఆగిపోవడం వల్ల అద్దె కట్టడం నిర్వాహకులకు ఇబ్బందిగా మారింది. రెండు నెలల నుంచి చెల్లించకపోవడం వల్ల యజమానులు ఆశ్రమాలు ఖాళీ చేయాలని ఒత్తిడి చేస్తున్నారని పలువురు విచారం వ్యక్తం చేస్తున్నారు. విద్యుత్‌, నీటి బిల్లులతో పాటు ఇతరత్రా ఖర్చులు భారంగా మారాయి. వైద్య పరీక్షల నిర్వాహణ, ఔషధాల పంపిణీ నిలిచిపోయింది. ఆశ్రమాల నిర్వాహణ కూడా చేయలేక నిర్వాహకులు పడరాని పాట్లు పడుతున్నారు. లాక్‌డౌన్‌ మొదట్లో కొందరు ఆశ్రమాలకు చేయూత ఇవ్వడానికి ముందుకొచ్చినప్పటికీ క్రమంగా వాటి గురించి పట్టించుకోవడం లేదని పలువురు ఆవేదన వ్యక్తం చేస్తున్నారు.

ఇదీ చూడండి :'క్రాప్​మండి' వెబ్​ పోర్టల్​ ప్రారంభించిన మంత్రి