నిండు గర్భిణీని సమయానికి ఆస్పత్రికి తరలించిన పోలీసులు

లాక్​డౌన్ సమస్య అన్ని వర్గాల ప్రజలతో పాటు రోగులనూ తీవ్ర ఇబ్బంది పెడుతోంది. వాహనాల కొరత వల్ల ప్రధానంగా గర్భిణీలు తీవ్రంగా బాధపడుతున్నారు. నగరంలో ఆస్పత్రికి వెళ్లలేక ఇబ్బంది పడుతున్న ఓ గర్భిణీకి పోలీసులు సమయానికి సాయం చేశారు. సురక్షితంగా ఆస్పత్రికి చేర్చి ప్రశసంలు పొందారు.

సికింద్రాబాద్​లోని వారసిగూడ నివాసి దత్తు తన భార్య గర్భిణీ శోభను సనత్​నగర్​లోని ఓ ప్రైవేటు ఆసుపత్రికి ద్విచక్రవాహనంపై తీసుకువెళ్తున్నాడు. ఈ క్రమంలో నొప్పులతో వాహనంపై కూర్చోలేక తీవ్ర ఇబ్బంది పడుతూ దిగి రోడ్డుపై కూర్చుండిపోయింది. ఈ ఘటనను చూసిన ఓ క్యాబ్ డ్రైవర్ వెంటనే వారికి ముషీరాబాద్ చౌరస్తా వరకు లిఫ్ట్​ ఇచ్చాడు.

తనకు పోలీసుల అనుమతి లేదని అంతకంటే ముందుకు వెళ్లలేనని డ్రైవర్ చెప్పాడు. ముషీరాబాద్ చౌరస్తాలో గర్భిణీ శోభను కారు నుంచి దింపుతున్న సమయంలో ఎస్సై రామారావు గుర్తించారు. వెంటనే ఆ గర్భిణీ వద్దకు వెళ్లి పోలీస్ పెట్రోలింగ్ వాహనంలో సురక్షితంగా సనత్​నగర్​లోని ప్రైవేటు ఆసుపత్రికి తరలించారు. వైద్య పరీక్షలు పూర్తైన తర్వాత ఆరోగ్యంగా ఉన్నట్లు వైద్యులు నిర్ధరించారు. సమయానికి ఆదుకున్న పోలీసులకు గర్భిణీ భర్త దత్తు ధన్యవాదాలు తెలిపారు.

ఇదీ చూడండి:కరోనా పంజా: 24 గంటల్లో 122 మరణాలు, 3525 కేసులు