Telangana Decade Celebrations : 'ప్రజాస్వామిక పోరాటాలకు తలమానికం.. తెలంగాణ సాధనోద్యమం'

Telangana Martyrs Memorial Day : రాష్ట్ర సాధనలో ప్రాణ త్యాగం చేసిన అమరులకు మంత్రులు హరీశ్‌రావు, కేటీఆర్ వినమ్ర శ్రద్ధాంజలి ఘటించారు. వారు చేసిన త్యాగాలను స్మరించుకున్నారు. ఈ క్రమంలోనే త్యాగధనులను ఎప్పుడూ గుండెల్లో పెట్టుకుంటామని కేటీఆర్ పేర్కొన్నారు. అమరుల స్ఫూర్తి, ప్రజ్వలిత దీప్తి అని హరీశ్‌రావు ట్వీట్ చేశారు.

Ministers on Telangana Martyrs Memorial Day : తెలంగాణ రాష్ట్రం ఆవిర్భవించి తొమ్మిది సంవత్సరాలు పూర్తి చేసుకొని.. పదో వసంతంలోకి అడుగుపెట్టిన విషయం తెలిసిందే. ఈ సందర్భంగా ప్రభుత్వం తెలంగాణ దశాబ్ది వేడుకలను ఘనంగా నిర్వహిస్తోంది. ఈ క్రమంలోనే ఉత్సవాల్లో చివరి రోజైన.. నేడు అమరుల సంస్మరణ దినోత్సవాన్ని నిర్వహిస్తున్నారు. ఇందులో భాగంగానే మంత్రులు కేటీఆర్, హరీశ్‌రావు అమరుల త్యాగాలను ట్విటర్ వేదికగా స్మరించుకున్నారు.

KTR Tweet Today :ప్రపంచ ప్రజా ఉద్యమాల చరిత్రలోనే సమున్నతం.. ప్రజాస్వామిక పోరాటాలకు తలమానికం తెలంగాణ సాధనోద్యమమని మంత్రి కేటీఆర్ పేర్కొన్నారు. అమరుల ఆశయం కేవలం స్వపరిపాలన మాత్రమే కాదని.. సుపరిపాలన ఫలాలను సమస్త ప్రజలకు అందించడమని తెలిపారు. దశాబ్దాలుగా పట్టిపీడించిన సకల దరిద్రాలను శాశ్వతంగా దూరం చేసి.. రాష్ట్ర సమాజాన్ని కష్టాల కడలి నుంచి గట్టెక్కించడమని కేటీఆర్ వెల్లడించారు.

అమరుల ఆశయాలే స్ఫూర్తిగా : అమరుల ఆశయాలే స్ఫూర్తిగా.. ప్రజల ఆత్మగౌరవ ఆకాంక్షలే ఊపిరిగా.. తెలంగాణ ఉద్యమ నినాదాలే మైలు రాళ్లుగా.. రాష్ట్ర అభివృద్ధి సాగిందని కేటీఆర్ తెలిపారు. దేశంలోనే తెలంగాణ అగ్రగామిగా తీర్చిదిద్దే మహాయజ్ఞం మహోద్యమంగా సాగిందనడానికి.. తొమ్మిదేళ్ల ప్రగతి ప్రస్థానమే నిలువెత్తు నిదర్శనమని స్పష్టంచేశారు. ఈ క్రమంలోనే భారత స్వాతంత్ర్య పోరాట యోధుల కలలు.. 75 ఏళ్లు దాటినా నెరవేరలేదని కేటీఆర్ వివరించారు.

నాలుగుకోట్ల తెలంగాణ ప్రజల సేవలో పునరంకితం :కానీ ఈ సందర్భంలోనే తొమ్మిది సంవత్సరాల స్వల్పకాలంలోనే.. తెలంగాణ అమరుల ఆకాంక్షలు నెరవేర్చి.. వచ్చే వందేళ్లకు బలమైన పునాది వేసిందని కేటీఆర్ పేర్కొన్నారు. ఈ సంకల్పమే యావత్ దేశానికి.. రాష్ట్రం నేర్పుతున్న పరిపాలనా పాఠమని వివరించారు. హైదరాబాద్ నడిబొడ్డున కొలువుదీరిన అమరుల స్మారక స్థూపం – జ్వలించే దీపం సాక్షిగా త్యాగధనులను ఎప్పుడూ గుండెల్లో పెట్టుకుంటామని ప్రతిజ్ఞ చేశారు. నాలుగుకోట్ల తెలంగాణ ప్రజల సేవలో పునరంకితం అవుతామని అన్నారు. లక్ష్యం కోల్పోయిన భారతదేశానికి దారిచూపే ఒక దీప స్తంభంగా రాష్ట్రంను నిలుపుతామని మాటిస్తున్నట్లు వెల్లడించారు. ఈ క్రమంలోనే తెలంగాణ అమర వీరులకు జోహార్లు ప్రకటిస్తూ కేటీఆర్ ట్వీట్ చేశారు.

అమర వీరుల త్యాగనిరతి ప్రకాశిస్తోంది : తెలంగాణ ప్రగతిలో అమర వీరుల త్యాగనిరతి ప్రకాశిస్తోందని మంత్రి హరీశ్‌రావు పేర్కొన్నారు. దశాబ్ది ఉత్సవాల్లో భాగంగా ఇవాళ అమరుల సంస్మరణ దినోత్సవం సందర్భంగా వారి త్యాగాలను ఆయన స్మరించుకున్నారు. తెలంగాణ రాష్ట్ర సాధన పోరాటంలో ప్రాణ త్యాగం చేసిన అమరులకు.. వినమ్ర శ్రద్ధాంజలి ఘటించారు. అమరుల త్యాగం, అజరామరం అన్న మంత్రి.. అమరుల స్ఫూర్తి, ప్రజ్వలిత దీప్తి అని వివరించారు. ఉద్యమ ధృవతారలకు ఘన నివాళి అర్పిస్తూ హరీశ్‌రావు ట్వీట్ చేశారు.

ఇవీ చదవండి :