కరోనా మహమ్మారి 2020 మార్చ్ నుంచి దాదాపు రెండేళ్ల పాటు ప్రజలను వణికించింది. మాస్కులు, లాక్‌డౌన్‌లు, ఐసోలేషన్ లు, సొంతవాళ్ల మరణాలతో.. అతలాకుతలమైనప్పటికీ గత కొన్ని నెలలుగా కాస్త ఉపశమనం లభించినట్లయ్యింది. కొవిడ్ కేసులు తగ్గుముఖం పట్టడంతో వ్యాక్సిన్ల వైపు సైతం ప్రజలుపెద్దగా ఆసక్తి కనబరచటం లేదు. అంతటా సాధారణ వాతావరణం నెలకొంటోందని సంతోషిస్తున్న సమయంలో.. ఉన్నట్టుండి రాష్ట్రాలకు కేంద్ర ప్రభుత్వ మార్గదర్శకాలు ఆందోళన కలిగిస్తున్న పరిస్థితి. ఇప్పటికే కొత్తగా నమోదవుతున్న కోవిడ్ కేసుల నమూనాలను జీనోం సీక్వెన్సింగ్‌కు పంపాలని కేంద్రం రాష్ట్రాలను ఆదేశించింది. దీంతో రాష్ట్ర ప్రభుత్వం అప్రమత్తం అయ్యింది.
కేంద్రం మార్గదర్శకాల నేపథ్యంలో.. వైద్య ఆరోగ్య శాఖ మంత్రి హరీశ్రావు ఉన్నతస్థాయి సమీక్ష నిర్వహించారు. కరోనా పట్ల ఆందోళన చెందవద్దని, అయితే అప్రమత్తంగా ఉండాల్సిన అవసరం ఉందని మంత్రి సూచించారు. ప్రతి ఒక్కరూ వ్యక్తిగత శుభ్రత పాటిస్తూ, కొవిడ్ టీకా తీసుకోని వారు వెంటనే తీసుకోవాలని.. బూస్టర్ డోసు వేసుకోవాలని కోరారు. కొవిడ్ నియంత్రణకు రాష్ట్ర ప్రభుత్వం సర్వం సిద్ధంగా ఉందని.. ప్రజలు ఎటువంటి భయాందోనళకు గురి కావద్దని మంత్రి తెలిపారు. ముఖ్యమంత్రి కేసీఆర్ దిశానిర్ధేశంతో రాష్ట్రం ఇప్పటికే కరోనాను విజయవంతంగా ఎదుర్కొని దేశంలోనే అత్యుత్తమ రాష్ట్రంగా నిలచిందని గుర్తుచేశారు.