హైదరాబాద్ బంజారాహిల్స్‌లో భూమి విలువ కోట్లకు పెరగడంతో సర్కారు భూములపై అక్రమార్కులు కన్నేశారు. నకిలీ డాక్యుమెంట్లు సృష్టించి ఇతరులకు కట్టబెట్టేందుకు యత్నిస్తున్నారు. బంజారాహిల్స్ రోడ్డు నెంబర్ 12లో ఉన్న ఏసీబీ కార్యాలయానికి ఎదురుగా ఉన్న 9 ఎకరాల 17 గుంటల భూమి విక్రయించేందుకు 4 నెలల క్రితం ఓ ఉపాధ్యాయుడితో రాంచందర్‌రావు ఒప్పందం చేసుకున్నాడు. అందుకోసం 10కోట్లు అడ్వాన్స్ తీసుకున్నాడు. ఆ స్థలం ప్రభుత్వానిదని తెలుసుకున్న ఉపాధ్యాయుడు పోలీసులకు ఫిర్యాదు చేయడంతో రాంచందర్‌రావు సహా మరోముగ్గురిపై క్రిమినల్ కేసు నమోదుచేసి అరెస్టు చేశారు. బెయిల్‌పై బయటికివచ్చిన నిందితుడు మళ్లీ ఆ భూమిని విక్రయించేందుకు షేక్ పేట తహసీల్దార్ సంతకం ఫోర్జరీ చేశాడు. ఆ పత్రాలు చూపించి భూమి విక్రయించేందుకు యత్నించి మరోసారి పోలీసులకు చిక్కాడు.
గతంలో బంజారాహిల్స్‌లోని ప్రభుత్వ భూములను కబ్జా చేసేందుకు అక్రమార్కులు ప్రయత్నించారు. బంజారాహిల్స్‌లో 1950లో 45 ఎకరాల్ని ముగ్గురికి అసైన్డ్‌భూముల కింద కేటాయించారు. అక్కడ గుట్టలు, రాళ్లు, గుంతలుండటంతో సాగుయోగ్యంగా లేదని 1960లో కలెక్టర్ రద్దు చేశారు. అప్పటికే ఆ భూమిని 3 హౌజింగ్ సొసైటీలు కొనుగోలు చేశాయి. కలెక్టర్ రద్దుచేయడంతో ఆ సొసైటీలు కోర్టును ఆశ్రయించాయి. 2005 ప్రభుత్వం శాసనసభకమిటీ నియమించడంతో క్రమబద్ధీకరణచేయాలని సూచించింది. 45 ఎకరాలకు ప్రస్తుతం 25 ఎకరాలే మిగిలింది. మూడు సొసైటీలకు సర్దుబాటు చేయడం కుదరకపోవడం వల్ల ప్రభుత్వం ఆ స్థలాన్ని వెనక్కి తీసుకుంది.