Space-Tech: రక్షణ రంగ ఉత్పత్తులకు కేంద్రంగా ఉన్న తెలంగాణను.. అంతరిక్ష సంబంధిత ఉత్పత్తులు, సేవలకు దేశీయ ప్రధాన కేంద్రంగా తీర్చిదిద్దే లక్ష్యంతో.. రాష్ట్ర ప్రభుత్వం చర్యలు చేపట్టంది. ఇప్పటికే రాష్ట్రంలో డీఆర్డీవో, ఎన్ఆర్ఎస్సీ, ఏడీఆర్ఐఎన్, డీఆర్డీఎల్,ఆర్సీఐ, బీడీఎల్, మిధాని, ఆర్డినెన్స్‌ ఫ్యాక్టరీ, డీఎమ్ఆర్ఎల్ వంటి జాతీయ సంస్థలు అంతరిక్ష సాంకేతిక రంగంలో సేవలందిస్తున్నాయి. కొత్తగా స్కైరూట్, ధ్రువ వంటి.. అంకుర సంస్థలు ఏర్పాటయ్యాయి. మరిన్ని పరిశ్రమల ఏర్పాటుకు సంస్థలు ముందుకొస్తున్నాయి. కేంద్రం సైతం అంతరిక్ష రంగంలో ప్రైవేట్‌ సంస్థలను ప్రోత్సహిస్తూ.. 'స్పేస్‌కామ్‌ పాలసీ-2020'ని తీసుకొచ్చింది. అందుకు అనుగుణంగా రాష్ట్ర ప్రభుత్వం.. స్పేస్‌-టెక్‌ విధానాన్ని రూపొందించింది.
దృశ్య మాధ్యమ విధానంలో..
ఇవాళ సాయంత్రం హైదరాబాద్‌లో పరిశ్రమలు, ఐటీ శాఖ మంత్రి కేటీఆర్.. ఈ పాలసీని దృశ్య మాధ్యమ విధానంలో విడుదల చేయనున్నారు. నీతి ఆయోగ్‌ సీఈవో అమితాబ్‌కాంత్.. భారత అంతరిక్ష పరిశోధన సంస్థ-ఇస్రో ఛైర్మన్‌ సోమనాథ్, ఇన్‌స్పేస్‌ సంస్థ ఛైర్మన్‌ పవన్‌ గోయంకాలు అందులో పాల్గొననున్నారు.
తొలిసారి ఇలా..
అయితే ఇది సాధారణ కార్యక్రమంగా కాకుండా.. దేశంలోనే తొలిసారిగా ఒక ప్రభుత్వ కార్యక్రమం పూర్తిగా మెటావర్స్ పద్ధతిన వినూత్నంగా జరగనుంది. కేటీఆర్ సహా అతిథులు, వక్తల రూపాలు తెరపై కనిపించేలా.. వర్చువల్ విధానంలో జరగనుంది. దేశంలోనే ఒక ప్రభుత్వ కార్యక్రమం మెటావర్స్ విధానంలో జరగడం ఇదే తొలిసారి. అంతరిక్ష సాంకేతికతకు కేంద్రస్థానంగా.. తెలంగాణను మార్చే సంకల్పంతో రాష్ట్ర ప్రభుత్వం.. కొత్త విధానంలో భారీగా రాయితీలు, ప్రోత్సాహకాలు ప్రకటించనుంది.