విజయవాడ రైల్వే స్టేషన్‌ యార్డులో దక్షిణ మధ్య రైల్వే భారీ ఎత్తున మార్పులు చేపట్టింది. ఈ మార్పులతో రైళ్ల నిరీక్షణ సమయం తగ్గడంతోపాటు సెక్షనల్‌ సామర్థ్యం మెరుగవుతుందని రైల్వే శాఖ వెల్లడించింది. దీనివల్ల ప్రధానంగా సికింద్రాబాద్‌-విశాఖపట్నం మధ్య ఏకకాలంలో రైళ్ల రాకపోకలకు సౌలభ్యం ఏర్పడుతుందని అధికారులు ఆశాభావం వ్యక్తం చేస్తున్నారు.
గతంలో సికింద్రాబాద్‌ - విశాఖపట్నం మార్గంలో ఒకేసారి రైళ్ల రాకపోకలు సాగించినప్పుడు రైళ్లు నిరీక్షించాల్సి వచ్చేది. దీని ప్రభావం ఇతర మార్గాల్లో వచ్చే రైళ్లపైనా పడేది. ఈ సమస్యలను అధిగమించేందుకు దక్షిణ మధ్య రైల్వే.. విజయవాడలోని ఉత్తర భాగం యార్డులో మార్పులు చేపట్టింది. ఇందులో భాగంగా 32 రూట్లతో ఎలక్ట్రానిక్‌ ఇంటర్‌లాకింగ్‌ (ఈఐ)తో నూతన బల్బ్‌ క్యాబిన్‌ ఏర్పాటు చేశారు. 1.5 కి.మీ నూతన లైన్‌తో 20 రూట్లతో అనుసంధానించింది.