Grapes Mela in Hyderabad: ద్రాక్ష.. బహుళ పోషక విలువలు గల విశిష్ట పండు. ఇది అంటే ఇష్టపడని వారుండరు. నాణ్యమైన తాజా ద్రాక్ష పండ్ల కోసం హైదరాబాద్‌లోని రాజేంద్రనగర్ కొండా లక్ష్మణ్‌ ఉద్యాన విశ్వవిద్యాలయం క్షేత్రంలో సందర్శకులు పోటీపడ్డారు. ఉత్సాహపూరిత వాతావరణం నడుమ రెండ్రోజులపాటు జరిగిన ద్రాక్ష మేళా ముగిసింది. ఆహ్లాదకరమైన వాతావరణం మధ్య చిన్నారులు, మహిళలు, పెద్దలు క్షేత్రంలో కలియ తిరుగుతూ.. రుచి చూసి ద్రాక్ష పండ్లను కొనుగోలు చేశారు.
దూర ప్రాంతాల నుంచి కుటుంబ సమేతంగా వచ్చి ద్రాక్ష పండ్ల రుచులు ఆస్వాదిస్తూ కిలో రూ.300 నుంచి రూ.500 చొప్పున కొనుగోలు చేశారు. ఉరుకుల పరుగుల జీవితాల నడుమ పల్లెల్లోని వ్యవసాయ క్షేత్రానికి వచ్చిన ఓ సదవకాశంగా సందర్శకులు భావించారు. 23 ఎకరాల సువిశాల విస్తీర్ణంలో 7.7 ఎకరాల్లో ద్రాక్ష రకాలు, సాగు, ఉత్పాదకత పెంపుపై శాస్త్రవేత్తలు విస్తృత పరిశోధనలు చేస్తున్నారు.
ప్రయోగాత్మకంగా 60 రకాల ద్రాక్ష పండ్ల సాగు: ఆరోగ్యపరంగా అత్యంత దోహదపడే 60 రకాల ద్రాక్ష పండ్లు ప్రయోగాత్మకంగా సాగు చేస్తున్నారు. ఈ ఏడాది కేవలం 5 ఎకరాల్లో సాగు చేసిన ద్రాక్ష తోట.. కోతకు సిద్ధం కావడంతో వేలం వేసిన వర్సిటీ యాజమాన్యం.. ప్రైవేట్ గుత్తేదారుకు అప్పగించింది. రుచికర ద్రాక్ష పండ్లకు డిమాండ్ కల్పించాలన్న లక్ష్యంతో ప్రతి ఏడాది ఈ తరహాలో మేళాలు నిర్వహిస్తుంటారు.
ద్రాక్ష మేళాకు అనూహ్య స్పందన:ఆరోగ్యపరంగా బహుళ ప్రయోజనాలు ఉన్న దృష్ట్యా.. రక్తహీనత, బీపీ, మధుమేహగ్రస్తులే కాకుండా అన్ని వయస్సుల వ్యక్తులు ద్రాక్ష పండ్లు నిరభ్యతరంగా తినవచ్చని నిర్వాహకులు చెప్పారు. ఈ ద్రాక్ష మేళాకు అనూహ్య స్పందన వచ్చింది. పెద్దఎత్తున కుటుంబాలు కార్లలో తరలి రావడంతో రెండు రోజుల్లో మొత్తం పండ్లు అమ్ముడుపోయాయి.