అత్యవసర ల్యాండింగ్​లు..

శంషాబాద్​ విమానాశ్రయంలో మూడు విమానాలు అత్యవసరంగా ల్యాండింగ్​ అయ్యాయి. ఇందులో రెండు విమానాలు సాంకేతిక లోపాలతో కిందికి దిగగా.. ఎవరికి ఏమీ కాకపోవటంతో ప్రయాణికులు ఊపిరి పీల్చుకున్నారు.

శంషాబాద్​ విమానాశ్రయంలో నిన్నటి నుంచి ఇప్పటివరకు మూడు విమానాలు అత్యవసరంగా ల్యాండింగ్​ అయ్యాయి.
సాంకేతిక సమస్యలతో..
సోమవారం ఉదయం 7 గంటలకు శంషాబాద్ నుంచి అమెరికాకు వెళ్లాల్సిన విమానం రన్ వే పైకి వెళ్ళగానే సాంకేతిక లోపం తలెత్తటంతో నిలిపివేశారు. 4 గంటల పాటు విమానంలోనే ఉన్న తరువాత 285 మంది ప్రయాణికులను నోవాటెల్ హోటల్​కు తరలించారు. నిన్నటి నుంచి ఇప్పటివరకు ప్రయాణికులు హోటల్​లోనే పడిగాపులు పడుతున్నారు. అధికారులు ఎలాంటి సమాధానం చెప్పకపోవటంతో ఆగ్రహం వ్యక్తం చేస్తున్నారు.
ఇంజన్​లో లోపంతో..
హైదరాబాద్‌ నుంచి దిల్లీకి వెళ్తున్న విస్తారా విమానానికి పెద్ద ప్రమాదం తప్పింది. గాల్లోకి లేచిన 15 నిమిషాలకు ఎడమ పక్క ఇంజన్‌లో సాంకేతిక లోపంతో గాల్లో చక్కర్లు కొట్టి విమానాశ్రయంలో దిగింది. సురక్షితంగా ల్యాండ్​ అవ్వటంతో అందులో ప్రయాణిస్తున్న 128 మంది ప్రయాణికులు ఊపిరి పీల్చుకున్నారు.

గుండెపోటుతో ప్రయాణికుడు మృతి..

మరో ఘటనలో కోల్​కత్తా నుంచి బెంగళూరు వెళ్తున్న ఎయిర్​ ఏషియా విమానంలో ప్రయాణికుడికి గుండెపోటు రావటంతో పైలట్​ అత్యవసర ల్యాండింగ్​ చేశారు. ఆస్పత్రికి తరలించే లోపే ఆ వ్యక్తి మృతి చెందాడు.