రాష్ట్రంలో పండే పత్తికి ప్రత్యేక పేరు పెట్టి 'తెలంగాణ బ్రాండ్'తో విక్రయించేందుకు రాష్ట్ర మార్కెటింగ్ శాఖ కసరత్తు ప్రారంభించింది. ఈ నేపథ్యంలో తమిళనాడులో వస్త్ర (స్పిన్నింగ్‌) మిల్లుల పత్తి కొనుగోలు విధానంపై అక్కడి నిపుణులతో రాష్ట్ర మార్కెటింగ్ శాఖ అధికారులు మాట్లాడారు. తెలంగాణలో పండిన పత్తిని మార్కెట్‌లో విక్రయించడంలో ఎదురవుతున్న సమస్యలనూ ప్రభుత్వం గుర్తించింది. రాష్ట్రంలో 400 వరకూ విత్తన కంపెనీలు అనేక రకాల పత్తి విత్తనాలను రైతులకు అమ్ముతున్నాయి. ప్రధాన కంపెనీల విత్తనాలతో పండే పంట నుంచే నాణ్యమైన దూది వస్తోంది. కొందరు వ్యాపారులు నాసిరకం, అనుమతి లేని పత్తి విత్తనాలను అమ్ముతున్నారు. వీటి నుంచి పొట్టిరకం, నాణ్యతలేని దూది వస్తోంది. దీన్ని కొనేందుకు వస్త్ర మిల్లులు ఆసక్తి కనబర్చడం లేదు. పంటకు సరైన ధర ఇవ్వడం లేదు.
నాణ్యమైన విత్తనాలపై పరిశోధనలు
తెలంగాణలో రైతు నుంచి వంద కిలోల పత్తిని కొంటే జిన్నింగ్‌ తరవాత 28 నుంచి 32 కిలోల దూది వస్తోంది. పలు దేశాలతో పాటు గుజరాత్‌లో సైతం 35 నుంచి 40 కిలోలదాకా వస్తోంది. రైతులందరికీ నాణ్యమైన విత్తనాలిస్తేనే అది సాధ్యమవుతుంది.