కేంద్ర ప్రభుత్వం గత నెలలో పూర్తి స్థాయి బడ్జెట్ ప్రవేశ పెట్టడం వల్ల కేంద్రం నుంచి రాష్ట్రానికి వచ్చే నిధులు, గ్రాంట్లపై స్పష్టత రావడం వల్ల రాష్ట్ర ప్రభుత్వం కూడా పూర్తి స్థాయి బడ్జెట్ ప్రవేశ పెట్టేందుకు వీలుగా ఆర్థిక శాఖ కసరత్తు చేస్తోంది. ఇప్పటికే అన్ని ప్రభుత్వ శాఖలను ఈ నెల 14వ తేదీ నాటికి 2019-20 బడ్జెట్ ప్రతిపాదనలతోపాటు 2018-19 ఆర్థిక సంవత్సరానికి సవరించిన బడ్జెట్ అంచనాల ప్రతిపాదనలను ఆర్థిక శాఖకు అందచేయాలని ప్రత్యేక ఉత్తర్వులు జారీ చేసింది. తొందరలోనే శాసనసభ సమావేశాలు ఏర్పాటు చేసి పూర్తి స్థాయి బడ్జెట్ ప్రవేశ పెట్టేందుకు ఏర్పాట్లు చేస్తోంది. కేంద్ర ప్రభుత్వం నుంచి వచ్చే పన్నుల వాటాతోపాటు కేంద్రం నుంచి రాష్ట్రానికి వివిధ పథకాలకు కింద వచ్చే గ్రాంట్లపై అంచనాలు రావడం వల్ల బడ్జెట్ రూపకల్పన ప్రక్రియ జరుగుతోంది.
ఉపాధి హామీ పథకం నిధులింకా రాలేదు
ఓట్‌ ఆన్‌ అకౌంట్‌ బడ్జెట్ ఏప్రిల్‌ నుంచి సెప్టెంబరు వరకు ఆరు నెలల కాలానికి రాష్ట్ర ప్రభుత్వం ఆమోదించింది. ఈ నెలాఖరులో లేదా వచ్చే నెల మొదటి వారంలో పూర్తి స్థాయి బడ్జెట్ ఉంటుందని అధికారులు భావిస్తున్నారు. కేంద్రం నుంచి రాష్ట్రానికి పన్నుల వాటాగా 2019-20 ఆర్థిక ఏడాదికి రూ.19718 కోట్లు వస్తుందని రాష్ట్ర ఆర్థిక శాఖ అంచనా వేసింది. మొదటి మూడు నెలల్లో కేంద్రం నుంచి వచ్చిన గ్రాంట్లను విశ్లేషించారు. జూన్‌ నెలాఖరు వరకు రాష్ట్రానికి రూ.1351 కోట్లు మాత్రమే గ్రాంట్లు రూపంలో వచ్చింది. మొదటి త్రైమాసికంలో ఉపాధి హామీ పథకం, 14వ ఆర్థిక సంఘం నిధులు రాష్ట్రానికి ఇప్పటి వరకు ఏమీ రాలేదు. ఈ నిధులు త్వరలో వస్తాయని... రాష్ట్ర ప్రభుత్వం అంచనా వేస్తోంది. గత ఆర్థిక సంవత్సరంలో గ్రాంట్ల రూపంలో రాష్ట్రానికి రూ.8,177 కోట్లు రాగా పన్నుల వాటా కింద రూ.13614 కోట్లు వచ్చింది.