BRS On Jamili Election 2023 : జమిలి ఎన్నికలకు బీఆర్ఎస్ సిద్ధం.. నేతలకు కేసీఆర్ మార్గనిర్దేశం

BRS On Jamili Election 2023 : జమిలి ఎన్నికలు వచ్చినా ఎదుర్కొనేందుకు సిద్ధంగా ఉండాలని పార్టీ శ్రేణులకు బీఆర్​ఎస్​ అధినేత, ముఖ్యమంత్రి కేసీఆర్​ నిర్దేశించారు. నిర్దేశిత గడువు ప్రకారం అసెంబ్లీ ఎన్నికలు నిర్వహించినా.. పార్లమెంటు ఎన్నికలతో పాటే వచ్చినా ఆందోళన చెందాల్సిన అవసరంలేదన్నారు. జమిలీతో మోదీ ప్రభావంతో రాష్ట్రంలో ఉండే అవకాశం లేదని.. అత్యధిక అసెంబ్లీ, పార్లమెంటు స్థానాలను బీఆర్​ఎస్​ గెల్చుకుంటుందని ధీమా వ్యక్తం చేసినట్లు తెలిసింది. గత సార్వత్రిక ఎన్నికల వేళ జరిగిన పొరపాట్లకు ఈ దఫా అవకాశం ఇవ్వొద్దని అభిప్రాయం వ్యక్తం చేసినట్లు పార్టీ వర్గాలు చెబుతున్నాయి.

BRS On Jamili Election 2023 : అసెంబ్లీ ఎన్నికలకు మూడునెలల ముందే అభ్యర్థులను ప్రకటించి, ఆశ్చర్యపర్చిన బీఆర్​ఎస్​(BRS) అధినేత.. మూడోసారి అధికారంలోకి వస్తామనే గట్టి ధీమాతో ఉన్నారు. ఈ నేపథ్యంలో దేశవ్యాప్తంగా జమిలి ఎన్నికల(One Nation One Election) చర్చ తెరపైకి రావటంతో ఆ దిశగానూ గులాబీ పార్టీ సిద్ధమవుతోంది. కేంద్ర ప్రభుత్వం జమిలి ఎన్నికలపై ఎలాంటి నిర్ణయం తీసుకున్నా.. అందుకు సిద్ధంగా ఉండాలని భావిస్తోంది. అసెంబ్లీ ఎన్నికలు యథావిధిగా నిర్వహించినా.. ఒకవేళ పార్లమెంటుతో కలిపి చేపట్టినా దీటుగా ఎదుర్కొందామని ముఖ్యమంత్రి కేసీఆర్(CM KCR)​ పార్టీ నాయకులకు నిర్దేశించినట్లు తెలిసింది. ఇటీవల పార్టీ ముఖ్య నాయకులతో వరుసగా నిర్వహించిన సమావేశాల్లో జమిలి ఎన్నికలపై ప్రధానంగా చర్చించినట్లుగా తెలుస్తోంది.

CM KCR Is Ready For Jamili Elections 2023 : జమిలి ఎన్నికలు నిర్వహించాలని కేంద్ర ప్రభుత్వం నిర్ణయిస్తే.. అందులో తాము చేసేదేమీ ఉండదని.. వద్దంటే ఆగేది కాదని సీఎం పార్టీ నేతల వద్ద వ్యాఖ్యానించినట్లు సమాచారం. ఏ విధంగానూ ఈ విషయంలో ప్రభావం చూపలేనప్పుడు అనవసరమైన ఆందోళన అవసరంలేదన్నారు. నిర్దేశిత గడువు ప్రకారమే అసెంబ్లీ ఎన్నికలు జరిపినా.. అలా కాకుండా పార్లమెంటు ఎన్నికలతో పాటు అసెంబ్లీ ఎన్నికలను నిర్వహించాలని కేంద్రం నిర్ణయించినా సిద్ధమేనని స్పష్టం చేశారు. ఈ క్రమంలో పార్లమెంటు ఎన్నికలు ముందుకొచ్చినా.. అసెంబ్లీ ఎన్నికలు ఆలస్యంగా జరిగినా.. అందుకు సిద్ధపడాల్సిందేనని పార్టీ నేతలకు నిర్దేశించినట్లు తెలిసింది.

BRS on One Nation One Election : ఒకవేళ అసెంబ్లీ ఎన్నికలు ఆలస్యమైనా కూడా పార్టీకి మేలే జరుగుతుందని అభిప్రాయపడినట్లు సమాచారం. అసెంబ్లీ కాలపరిమితిని మరో ఆరేళ్లు పొడిగిస్తే.. ఆ మేరకు మరిన్ని అభివృద్ధి పనులు చేసి, ప్రజలకు చేరువ అవ్వడానికి అవకాశాలు పెరుగుతాయనే అభిప్రాయం వ్యక్తమైనట్లు తెలుస్తోంది. జమిలి ఎన్నికలు జరిగినా కూడా.. ప్రధానమంత్రి నరేంద్రమోదీ ప్రభావం తెలంగాణలో ఏమీ ఉండబోదని.. కచ్చితంగా బీఆర్​ఎస్​నే అత్యధిక అసెంబ్లీ, పార్లమెంటు స్థానాలను గెలుచుకుంటుందని సీఎం ధీమా వ్యక్తం చేసినట్లు తెలిసింది.

గత పార్లమెంటు ఎన్నికల్లో 3 స్థానాల్లో బీఆర్​ఎస్​ ఓటమికి కారణాలు : గత పార్లమెంటు ఎన్నికల్లో కరీంనగర్‌, నిజామాబాద్‌, ఆదిలాబాద్‌ తదితర లోక్‌సభ స్థానాల్లో బీఆర్​ఎస్​ అభ్యర్థులు ఓడిపోవడానికి కారణాలు కూడా ఈ సందర్భంగా నేతల మధ్య చర్చకొచ్చినట్లు తెలిసింది. ఆ ఓటమికి పూర్తిగా మోదీ, బీజేపీ ప్రాభల్యమే కాదని, ఆ స్థానాల్లో బీఆర్​ఎస్​ అభ్యర్థులు కచ్చితంగా గెలుస్తారనే అతి విశ్వాసమూ కారణమని విశ్లేషించినట్లు తెలిసింది. ఉదాహరణగా ఖమ్మం, మహబూబాబాద్‌, కరీంనగర్‌ లోక్‌సభ నియోజకవర్గాలను ప్రస్తావించినట్లు సమాచారం.

2018 ఎన్నికల్లో ఖమ్మం లోక్‌సభ స్థానం పరిధిలో ఆరు అసెంబ్లీ సీట్లను కాంగ్రెస్‌ గెలుచుకోగా.. బీఆర్​ఎస్​ ఒకటే గెలిచింది. అదే విధంగా మహబూబాబాద్‌ పార్లమెంటు స్థానం పరిధిలోని 4 అసెంబ్లీ స్థానాలను కాంగ్రెస్‌ దక్కించుకోగా.. మూడింటిని బీఆర్​ఎస్​ పొందింది. ఆ తర్వాత స్థానిక రాజకీయ పరిస్థితుల నేపథ్యంలో ఈ రెండు లోక్‌సభ స్థానాల్లో బీఆర్​ఎస్​ అభ్యర్థులు గెలవాలనే పట్టుదలతో ముఖ్యమంత్రి కేసీఆర్‌ దృష్టి పెట్టారు. ఫలితంగా ఖమ్మంలో 1.60 లక్షల మెజారిటీతో, మహబూబాబాద్‌లోనూ 1.30 లక్షల మెజారిటీతో బీఆర్​ఎస్​ అభ్యర్థులే విజయం సాధించారని అని పార్టీ సీనియర్‌ నేత ఒకరు వివరించారు.

Telangana Assembly Election 2023 : అదే కరీంనగర్‌ లోక్‌సభ నియోజకవర్గ పరిధిలో 7 అసెంబ్లీ సీట్లను బీఆర్​ఎస్​ గెలుచుకోగా.. ఈ స్థానం పరిధిలో బీఆర్​ఎస్​కు 5 లక్షల మెజారిటీ వచ్చింది. అయితే ఇక్కడ కచ్చితంగా గెలుస్తామనే ధీమా ఉండడంతో.. కొంత ఏమరుపాటుగా వ్యవహరించిన కారణంగా ఇక్కడ ఓటమి పాలవ్వాల్సి వచ్చిందని ఆయన తెలిపారు. పూర్తి స్థాయిలో దృష్టి కేంద్రీకరిస్తే.. విజయం సాధించవచ్చని.. ఏమాత్రం పట్టువిడిచినా విజయం చేజారిపోతుందనడానికి గత పరాభావాలనే ఉదాహరణగా సీఎం వద్ద సమావేశంలో చర్చించినట్లు సమాచారం.